សហភាពអឺរ៉ុបពិន័យក្រុមហ៊ុន Apple និង Meta ជាប្រាក់ជិត ៨០០លានដុល្លារ ជុំវិញករណីបំពានច្បាប់ប្រកួតប្រជែងឌីជីថល

បែលហ្សិក៖ សហភាពអឺរ៉ុបបានពិន័យក្រុមហ៊ុនយក្សអាមេរិក Apple និង Meta ជាប្រាក់ចំនួន ៧០០លានអឺរ៉ូ (ជាង ៧៩៦លានដុល្លារ) ជុំវិញករណីបំពានច្បាប់ប្រកួតប្រជែងឌីជីថល នេះបើយោងតាមការចុះផ្សាយរ​បស់បណ្តាញសារព័ត៌មាន​ The Strait Time។ នៅក្នុងទំហំប្រាក់ពិន័យរួមគ្នាខាងលើនេះ គឺក្រុមហ៊ុន Apple តែម្នាក់ឯងត្រូវរងនូវការពិន័យជាប្រាក់ចំនួន ៥០០លានអឺរ៉ូ (៥៦៨ លានដុល្លារ) ខណៈចំណែកដែលនៅសល់ចំនួន ២០០លានអឺរ៉ូ គឺជាប្រាក់ដែលត្រូវពិន័យទៅលើក្រុមហ៊ុន Meta ។

បើតាមគណៈកម្មការអឺរ៉ុបបានបញ្ជាក់ថា ការពិន័យទៅលើក្រុមហ៊ុន Apple គឺត្រូវបានធ្វើឡើងក្រោយមានការរកឃើញថា ក្រុមហ៊ុន Apple បានរារាំងក្រុមអ្នកអភិវឌ្ឍន៍កម្មវិធីទូរស័ព្ទជាច្រើនមិនឱ្យពួកគេអាចដាក់លក់កម្មវិធីរបស់ពួកគេនៅក្នុង App Store ដោយស្របច្បាប់នោះទេ ហើយការដាក់សម្ពាធនេះគឺត្រូវបានធ្វើឡើងដើម្បីឱ្យក្រុមអ្នកអភិវឌ្ឍន៍កម្មវិធីទាំងនោះត្រូវបង្ខំចិត្តដាក់លក់កម្មវិធីរបស់ពួកគេក្នុងតម្លៃទាបជាងការរំពឹងទុក។ ដោយឡែកសម្រាប់ការពិន័យទៅលើក្រុមហ៊ុន Meta វិញគឺត្រូវបានធ្វើឡើងក្រោមហេតុផលថា ក្រុមហ៊ុន Meta បានលួចប្រើប្រាស់ទិន្នន័យផ្ទាល់ខ្លួនរបស់ម្ចាស់គណនីបណ្តាញសង្គម Facebook និង Instagram ដោយបំពានទៅនឹងច្បាប់ឯកជនភាពរបស់អ្នកប្រើប្រាស់ ដើម្បីរកប្រាក់ចំណូលតាមរយៈការផ្សព្វផ្សាយពាណិជ្ជកម្មឱ្យត្រូវនឹងទំនោររបស់ក្រុមម្ចាស់គណនីទាំងនោះ៕

អត្ថបទ៖ ភក្តី

ប្រភព៖ The Strait Time