មេខ្លោងបោកប្រាស់និងជាអ្នកជាប់ពាក់ព័ន្ធក្នុងករណីឃាតកម្មលើនិស្សិតកូរ៉េខាងត្បូងម្នាក់ ត្រូវបានចាប់ខ្លួននៅក្នុងប្រទេសថៃ

ថៃ៖ ជនសង្ស័យដែល​ជាមេខ្លោងក្នុងប្រតិបត្តិការបោកប្រាស់​និងជាអ្នកជាប់ពាក់ព័ន្ធនឹងករណីឃាត់កម្មនិស្សិតកូរ៉េខាងត្បូងយ៉ាងឃោរឃៅនាពេលកន្លងមក ត្រូវបានចាប់ខ្លួននៅប្រទេសថៃ នេះបើយោងតាមការចុះផ្សាយ​របស់បណ្តាញសារព័ត៌មាន South China Morning Post កាលពីថ្ងៃទី១៣ ខែមករា។ ជនសង្ស័យរូបនេះគឺជាជនជាតិចិន មានឈ្មោះថា Han Mo និងមានអាយុ ៤២ឆ្នាំ។

ប្រភពខាងលើបានបន្តថា លោក Han Mo​ ត្រូវបានចាប់ខ្លួននៅក្នុងផ្ទះប្រណិតមួយកន្លែងនៅក្នុងទីក្រុងប៉ាតាយ៉ា ខណៈប្រតិបត្តិការណ៍ចាប់ខ្លួននេះគឺជាប្រតិប​ត្តិការណ៍រួមគ្នារវាងកងកម្លាំងកូរ៉េខាងត្បូងនិងកងកម្លាំងថៃ។ គួររម្លឹកជូនថា និស្សិតជនជាតិកូរ៉េខាងត្បូងដែលបានទទួលមរណៈភាពយ៉ាងព្រៃផ្សៃនោះមានឈ្មោះថា Park និងមានអាយុ ២២ឆ្នាំ​ ហើយសាកសពរបស់គាត់ត្រូវបានគេរកឃើញនៅក្នុងរថយន្តមួយគ្រឿង ដែលគេបើកយកមកចតចោលនៅក្បែរភ្នំបូកគោក្នុងខេត្តកំពត នៃប្រទេសកម្ពុជា៕

អត្ថបទ៖ ភក្តី

ប្រភព៖ South China Morning Post