លោក ដូណាល់ ត្រាំ ប្រកាសថាប្រទេសដែលចង់ចូលជាសមាជិកអចិន្ត្រៃយ៍នៃ “ក្រុមប្រឹក្សាសន្តិភាព” ត្រូវបង់វិភាគទានចំនួន ១ពាន់លានដុល្លារអាមេរិក

អាមេរិក៖ លោកប្រធានាធិបតីអាមេរិក ដូណាល់ ត្រាំ បានប្រកាសគិតថ្លៃជាទឹកប្រាក់ចំនួន ១ពាន់លានដុល្លារចំពោះប្រទេសទាំងឡាយណា ដែលចង់ចូលជាសមាជិកអចិន្ត្រៃយ៍នៃ “ក្រុមប្រឹក្សាសន្តិភាព” នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃទី២០ ខែមករា។ សូមបញ្ជាក់ជូនថា “ក្រុមប្រឹក្សាសន្តិភាព” ជាស្ថាប័នមួយ ដែលមានតួនាទីយ៉ាង​សំខាន់ក្នុងការថែរក្សាសន្តិភាព, ដោះស្រាយជម្លោះ និង លើកកម្ពស់សន្តិសុខនិងស្ថិរភាពនៅលើពិភពលោក។

ថ្លែងនៅក្នុងសេតវិមាន លោក ដូណាល់ ត្រាំ បានអំពាវនាវដោយផ្ទាល់ទៅកាន់មេដឹកនាំនៃប្រទេសធំៗមួយចំនួនឱ្យសម្រេចចិត្តចូលជាសមាជិកអចិន្ត្រៃយ៍នៃ “ក្រុមប្រឹក្សាសន្តិភាព” ដែលក្នុងពេលបច្ចុប្បន្ននេះគឺរូបលោកផ្ទាល់ជាប្រធានដឹកនៃស្ថាប័នមួយនេះ។ មេដឹកនាំសំខាន់ៗដែលត្រូវបានលោក ដូណាល់ ត្រាំ អញ្ជើញឱ្យចូលជាសមាជិកអចិន្ត្រៃយ៍នៃ “ក្រុមប្រឹក្សាសន្តិភាព” នោះរួមមាន លោក Vladimir Putin ប្រធានាធិបតីនៃប្រទេសរុស្ស៊ី, លោក Viktor Orban​ នាយករដ្ឋមន្ត្រីនៃប្រទេសហុងគ្រី និងលោក Mark Carney នាយករដ្ឋមន្ត្រីនៃប្រទេសកាណាដាជាដើម។ យ៉ាងណាក្តី លោក ដូណាល់ ត្រាំ បានបញ្ជាក់ថា ការចូលជាសមាជិកអចិន្ត្រៃយ៍នៃ”ក្រុមប្រឹក្សាសន្តិភាព” ក៏ត្រូវមានលក្ខខណ្ឌមួយចំនួនផងដែរ ដូចជាការបង់ប្រាក់ចំនួន ១ពាន់លានដុល្លារនេះនឹងអនុញ្ញាតឱ្យប្រទេសមួយមានសិទ្ធជាសមាជិកអចិន្ត្រៃយ៍នៃ “ក្រុមប្រឹក្សាសន្តិភាព” ក្នុងរយៈពេលត្រឹមតែ ៣ឆ្នាំប៉ុណ្ណោះ ប៉ុន្តែប្រសិនបើក្នុងរយៈពេល ១ឆ្នាំដំបូង ប្រទេសនោះបានបង់ប្រាក់ច្រើនជាង ១ពាន់លានដុល្លារ នោះសុពលភាពជាសមាជិកអចិន្ត្រៃយ៍នៃ”ក្រុមប្រឹក្សាសន្តិភាព” អាចនឹងយូរជាង ៣ឆ្នាំ៕

អត្ថបទ៖ ភក្តី

ប្រភព៖ Channel News Asia