ពេលនេះក្លឹប Benfica បញ្ចប់ពាក្យចចាមអារ៉ាមរបស់កីឡាករ Joao Felix និងប្រកាសលក់កីឡាករ Joao Felix អោយក្លឹបយក្សនៅអេស្ប៉ាញ Atletico Madrid នៅក្នុងតំលៃខ្លួនយ៉ាងច្រើនប្រមាណជា..

ទីបំផុតក្លឹបនៅប្រទេសព័រទុយហ្គាល Benfica បានបញ្ចប់ព័ត៌មានចចាមអារ៉ាមរបស់កីឡាករវ័យក្មេងដែលគេអោយរហ័សនាមជា Christiano Ronaldo និងមានសញ្ធាតិព័រទុយហ្គាល Joao Felix ដោយក្លឹប Benfica បានប្រកាសថា Joao Felix បានចុះកុងត្រាជាមួយក្លឹប Atletico Madrid នៅក្នុងតំលៃខ្លួន ១០៧.៣លានផោន។ គួរបញ្ជាក់ផងដែរថា Felix ដែលទើបតែមានវ័យ១៩ឆ្នាំរូបនេះបានធ្វើអោយក្លឹប benfica ចាប់អារម្មណ៍នឹងទម្រង់លេងយ៉ាងខ្លាំងនៅក្នុងរដូវកាលមុនដោយរកបាន ១៥គ្រាប់ក្នុងការបង្ហាញខ្លួន២៦លើក ក្នុងក្របខ័ណ្ឌ Primeria Liga របស់ប្រទេសព័រទុយហ្គាល និងបានជួយអោយក្លឹបឈ្នះជើងឯកផងដែរ។

គួររម្លឹកផងដែរថា កីឡាករ Felix ទើបតែនឹងបង្ហាញខ្លួនជាលើកដំបូងអោយឈុតធំរបស់ Benfica តែប៉ុណ្ណោះ ខណៈដែរកីឡាកររូបនេះបានលេងអោយឈុតតូចគឺ Benfica B ចំនួនពីររដូវកាលមុននឹងតំឡើងអោយលេងឈុតធំរបស់ក្លឹប។ ដូចនេះហើយ Felix បានទាក់ទាញចំណាប់អារម្មណ៍របស់ក្លឹបកំពូលនៅក្នុងទ្វីបអឺរ៉ុបជាច្រើន ហើយនៅក្នុងនោះដែរក៏មានក្លឹបបិសាចក្រហម Manchester United នឹងក្លឹប Manchester City បានទំនាក់ទំនងយ៉ាងស្អិតផងដែរ។

ទោះជាយ៉ាងនេះក្តី ក្លឹប Atletico Madrid បានសម្រេចនាំយកកីឡាករ Felix ក្នុងតំលៃខ្លួន ១០៧លានផោន ដែរស្មើនឹង ១២៦លានអឺរ៉ូ ពីក្លឹប Benfica និងបានបំបែកកំណត់ត្រារបស់ក្លឹបក្នុងរដូវកាលនេះផងដែរ។ ហើយកីឡាករ Felix បានក្លាយជាកីឡាករដែលមានតំលៃខ្លួនថ្លៃជាងគេក្នុងលេខរៀងទី៥បន្ទាប់ពីកីឡាករ Neymar, Kylian Mbappe, Philippe Coutinho and Ousmane Dembele ផងដែរ ហើយមួយវិញទៀតគាត់នឹងក្លាយជាកីឡាករមួយរូបដែររកចំនូលបានច្រើនមែនទែនប្រហែលជា ៣២.១៨លានផោនក្នុងមួយឆ្នាំពីការដោះដូរមួយនេះផងដែរ៕

អត្ថបទ៖ សុគុណា
ប្រភព៖ GiveMeSport.com