យោងតាម Business Insider បានឱ្យដឹងថា ប៉ូលីសប្រេស៊ីលបានឃាត់ និងបិទរោងចក្រផលិតរថយន្តទំនើបសម្ងាត់មួយ ដែលកំពុងសំងំផលិតរថយន្ត Ferrari និង Lamborghini ក្លែងក្លាយ។ វាត្រូវបានគេឱ្យដឹងថា ទីតាំងសម្ងាត់មួយនោះបង្កើតឡើងដោយ ឪពុក និងកូន ២នាក់ ដែលរស់នៅភាគខាងត្បូងនៃរដ្ឋសាន់តាកាតារីណា របស់ប្រទេសប្រេស៊ីល ហើយពួកគេទាំងគូក៏ត្រូវបានប៉ូលីសចាប់ខ្លួនរួចហើយដែរ ក្រោមបទចោទប្រកាន់ទាក់ទងនឹងកម្មសិទ្ធិបញ្ញា។

ក្រុមមន្ដ្រីប៉ូលីសបាននិយាយថា រថយន្ដទាំងនេះត្រូវបានដាក់លក់នៅលើប្រព័ន្ធផ្សព្វផ្សាយសង្គម ក្នុងតម្លៃត្រឹមតែ 45,000ដុល្លារ ទៅ 60,000ដុល្លារ ប៉ុណ្ណោះ ដែលតម្លៃនេះគឺថោកខ្លាំងមែនទែនពីតម្លៃម៉ូដែលពិតប្រាកដ។ ក្រុមមន្រ្តីមិនបាននិយាយថា តើគ្រឿងបន្លាស់ប្រភេទណាខ្លះត្រូវបានប្រើប្រាស់ ដើម្បីផលិតរថយន្តក្លែងក្លាយទាំងនោះទេ ប៉ុន្តែពួកគេបានចែកចាយរូបថតមួយចំនួន ដែលបង្ហាញពីរូបរាងរលោងរបស់រថយន្តក្លែងក្លាយទាំងនោះ ព្រមទាំងស្លាកសញ្ញា និងគ្រឿងបន្លាស់របស់រថយន្តម៉ាក។

ការវាយឆ្មក់កាលពីថ្ងៃចន្ទ ជាការធ្វើតាមពាក្យបណ្តឹងរបស់ក្រុមហ៊ុនអ៊ីតាលីទាំង ២ (Ferrari និង Lamborghini) ហើយរថយន្តចំនួន ៨គ្រឿង ត្រូវបានរឹបអូសផងដែរ៕

អត្ថបទ៖ លីដា