Toyota Raize ចំនួន 191 គ្រឿង នៅវៀតណាម ត្រូវហៅត្រឡប់មកវិញ ក្រោយពីបានរកឃើញបញ្ហាបច្ចេកទេស តំណភ្ជាប់បូមខាងមុខ
- BY
- autoadmin
- May 5, 2022
ក្រុមហ៊ុនតូយ៉ូតាវៀតណាម (Toyota Motor Việt Nam) កំពុងចាប់ផ្តើមប្រមូលរថយន្តម៉ាក Raize ចំនួន ១៩១ គ្រឿង ត្រឡប់មកវិញ ដើម្បីធ្វើការជួសជុលផ្នែកភ្ជាប់ទៅបូមទប់ខាងមុខ (Shock Absorber) ដែលបានចាប់ផ្តើមពីថ្ងៃពុធ ថ្ងៃទី០៤ ខែឧសភា ឆ្នាំ២០២២ រហូតដល់ថ្ងៃទី០៤ ខែឧសភា ឆ្នាំ២០២៥។ យោងតាមការិយាល័យចុះបញ្ជីរបស់វៀតណាមបានឱ្យដឹងថា រថយន្តដែលត្រូវប្រកាសឱ្យមានការប្រមូលមកត្រួតពិនិត្យ គឺជារថយន្តដែលផលិតនៅកំឡុងថ្ងៃទី២៩ ខែមីនា ដល់ថ្ងៃទី០៨ ខែតុលា ក្នុងប្រទេសឥណ្ឌូនេស៊ីកាលពីឆ្នាំមុន។
ក្នុងករណីដែលអតិថិជនចង់ពិនិត្យមើលថា តើរថយន្តរបស់ពួកគេស្ថិតក្នុងបញ្ជីនៃកម្មវិធីនេះ ឬអត់នោះ ពួកគេអាចទាក់ទងទៅក្រុមហ៊ុនតូយ៉ូតាវៀតណាម និងក្រុមហ៊ុនចែកចាយតូយ៉ូតាទូទាំងប្រទេស ដើម្បីទទួលបានជំនួយការបន្ថែមទៀត។ សម្រាប់ព័ត៌មានបន្ថែម អតិថិជនអាចទាក់ទងដោយផ្ទាល់ ទៅកាន់អ្នកចែកចាយតូយ៉ូតាដែលនៅជិតបំផុត ឬលេខទូរស័ព្ទទាន់ហេតុការណ៍របស់ក្រុមហ៊ុនតូយ៉ូតាតាមតំបន់។ ការត្រួតពិនិត្យ និងជួសជុលរថយន្តក្នុង ១ គ្រឿង អាចចំណាយពេលចាប់ពី ៧.៦ ម៉ោង ដល់ ២៤.១ ម៉ោង ហើយមិនគិតថ្លៃសេវានោះទេ។
រថយន្ត Toyota Raize ត្រូវបានដាក់លក់លើទីផ្សារដោយ Toyota Vietnam កាលពីថ្ងៃទី០៤ ខែវិច្ឆិកា ឆ្នាំមុន ជាមួយនឹងតម្លៃលក់ចាប់ពី ៥២៧ លានដុង ឬ ២៣,០០០ ដុល្លារ រហូតដល់ ៥៣៥ លានដុង ឬ ២៣,៣០០ ដុល្លារ ។ របាយការណ៍របស់សមាគមក្រុមហ៊ុនផលិតរថយន្តវៀតណាម (VAMA) បានបង្ហាញថា រថយន្ត Toyota Raize ចំនួន ៦៨៨ គ្រឿង ត្រូវបានលក់ក្នុងខែមីនា ដែលនាំឱ្យការលក់សរុបក្នុងរយៈពេល ៣ ខែដំបូងនៃឆ្នាំនេះ មានដល់ ១,៦៧១ គ្រឿង៕
អត្ថបទ៖ លីដា
ប្រភព៖ Vietnam News
- Share This Post: