លោក ដូណាល់ ត្រាំ សរសេរសាថា “ជួបគ្នាឆាប់ៗ!” និងអំពាវនាវឱ្យមេដឹកនាំកូរ៉េខាងជើង ឱ្យទទួលយកកិច្ចព្រមព្រៀងនុយក្លេអ៊ែរឆាប់ៗនេះ

ប្រធានាធិបតីអាមេរិកលោក ដូណាល់ ត្រាំ បានអំពាវនាវឱ្យមេដឹកនាំកូរ៉េខាងជើងលោក គីម ជុងអ៊ុន ចាត់វិធានការយ៉ាងឆាប់រហ័ស និងទទួលយកកិច្ចព្រមព្រៀងនុយក្លេអ៊ែរ។ នៅលើបណ្តាញសង្គម Twitter គាត់បានសរសេរថា៖ “ជួបគ្នាឆាប់ៗ!” សារនេះបានកើតឡើងបន្ទាប់ពីប្រទេសកូរ៉េខាងជើងកាលពីសប្តាហ៍មុន បានហៅអតីតអនុប្រធានាធិបតីសហរដ្ឋអាមេរិកលោក Joe Biden ថាជា “ឆ្កែសាហាវ” ដោយសារលោក Biden បង្កាច់បង្ខូចលោក គីម ។

លោក ត្រាំ និងលោក គីម បានឯកភាពគ្នានៅក្នុងកិច្ចប្រជុំកំពូលលើកទី៣ របស់ពួកគេ កាលពីខែមិថុនាថា ប្រទេសទាំងពីរនឹងចាប់ផ្តើមកិច្ចពិភាក្សាឡើងវិញក្នុងរយៈពេលពីរបីសប្តាហ៍ទៀត។ ប៉ុន្តែការចរចាបានជាប់គាំងនៅពេលដែលអាមេរិកទាមទារឱ្យមានការរំសាយអាវុធនុយក្លេអ៊ែរទាំងស្រុងរបស់កូរ៉េខាងជើង។ ចំណែកក្រុងព្យុងយ៉ាងបានស្វែងរកការបន្ធូរបន្ថយទណ្ឌកម្មរបស់សហរដ្ឋអាមេរិក ជាថ្នូរនឹងជំហានរបស់ខ្លួនឆ្ពោះទៅរកការរំសាយអាវុធនុយក្លេអ៊ែរ៕

អត្ថបទ៖ លីដា