NASA និយាយថា នឹងមានអាចម៍ផ្កាយទំហំប៉ុនពីរ៉ាមីតដ៏អស្ចារ្យនៃហ្គីហ្សា ធ្លាក់មកលើផែនដីនៅឆ្នាំ២០២២

យោងតាមសារព័ត៌មាន Express បានឱ្យដឹងថា មានអាចម៍ផ្កាយទំហំប៉ុនពីរ៉ាមីតដ៏អស្ចារ្យនៃហ្គីហ្សា (Great Pyramid of Giza) នឹងមកដល់ផែនដីនៅ ឆ្នាំ២០២២ នេះហើយ។ ក្នុងនោះផងដែរ NASA បានសរសេរសេចក្ដីរាយការណ៍មួយថា អាចម៍ផ្កាយមួយឈ្មោះថា JF1 គឺកំពុងធ្វើដំណើរមកកាន់ផែនដីនេះហើយ។ វាមានទំហំ ១០០ម៉ែត្រ ហើយប្រហែលជាមកដល់ផែនដីនៅថ្ងៃទី០៦ ខែឧសភា ឆ្នាំ២០២២។ JF1 កំពុងធ្វើដំណើរក្នុងគន្លង និងអាចបុកផែនដី ជាមួយនឹងកម្លាំង ២៣០គីឡូ​តោន (230 kilotonnes) ឬ ២៣០,០០០ តោននៃកម្លាំងផ្ទុះ (TNT) ។

អ្វីដែលកាន់តែគួរឱ្យបារម្ភនោះគឺថា ផលប៉ះពាល់ដែលផែនដីនឹងប្រឈមមុខគឺធំជាងគ្រាប់បែក ដែលអាមេរិចទម្លាក់លើកោះហ៊ីរ៉ូស៊ីម៉ា ក្នុងឆ្នាំ១៩៤៥ រហូតដល់ ១៥ដង។ មិនត្រឹមតែប៉ុណ្ណឹងទេ! វាអាចនឹងប្រហារកន្លែងដែលសម្បូរមនុស្សដូចជាទីក្រុងធំណាមួយ និងបណ្តាលឱ្យមនុស្សស្លាប់ជាច្រើន។ ពួកគេក៏បានព្រមានផងដែរថា បើទោះបីជាវាវាយប្រហារនៅតំបន់ដាច់ស្រយាលបំផុត ឬមហាសមុទ្រប៉ាស៊ីហ្វិកក៏ដោយ ក៏វានៅតែអាចបង្កគ្រោះមហន្តរាយធម្មជាតិដូចជា៖ រលកយក្សស៊ូណាមិ និងចំហាយនុយក្លេអ៊ែរ ដែលគេឱ្យឈ្មោះថា Nuclear winter ។ ប៉ុន្តែយ៉ាងណាក៏ដោយ NASA បាននិយាយថា ឱកាសដែលវាប៉ះនឹងផែនដីគឺ ១ ក្នុង ៣,៨០០ ប៉ុណ្ណោះ! ហើយពួកគេក៏កំពុងឱ្យអ្នកជំនាញសិក្សាបន្ថែមពីដំណើររបស់វាផងដែ៕

អត្ថបទ៖ លីដា