កុមារតូចៗដែលរស់នៅជិតផ្លូវមមាញឹក ដែលមានផ្សែងពុលពីម៉ូតូ និងរថយន្ត អាចមានហានិភ័យខ្ពស់ពីមហារីក ហើយសួតគ្មានការលូតលាស់នោះទេ

ការរស់នៅក្បែរផ្លូវមមាញឹក ដែលពោរពេញដោយរថយន្ត ឬម៉ូតូ អាចធ្វើឱ្យប៉ះពាល់ដល់ការលូតលាស់សួតរបស់កុមារ។ កុមារត្រូវបានរកឃើញថា បានរងផលប៉ះពាល់យ៉ាងខ្លាំង ទោះបីជាពួកគេរស់នៅចម្ងាយ ៥០ម៉ែត្រ ពីផ្លូវក៏ដោយ។ តាមការសិក្សាលើទីក្រុងចំនួន ១៣ នៅចក្រភពអង់គ្លេស និងប៉ូឡូញបានរកឃើញថា ការបំពុលបរិយាកាសបង្កឱ្យមានឱកាសខ្ពស់នៃជំងឺបេះដូង ដាច់សរសៃឈាមខួរក្បាល ខ្សោយបេះដូង និងរលាកទងសួត។ របាយការណ៍ដដែលក៏បានរកឃើញថា ១៤% នៃកុមារនៅទីក្រុង Oxford, ១៣% នៅទីក្រុង London និង ៨% នៅទីក្រុង Birmingham របស់អង់គ្លេស សុទ្ធតែរងប៉ះពាល់ដោយមានសួតគ្មានការលូតលាស់ល្អទាំងអស់។

យោងតាមការស្រាវជ្រាវដែលសរសេរដោយ King’s College London និងចេញដោយសម្ព័ន្ធអង្គការសុខភាព និងបរិស្ថានចំនួន ១៥ បាននិយាយថា ការរស់នៅក្បែរផ្លូវដែលមានចរាចរណ៍មមាញឹកច្រើន អាចបង្កើនហានិភ័យនៃការវិវត្តទៅជាជំងឺមហារីកសួតរហូតដល់ ១០% ។ ការស្រាវជ្រាវថ្មីក៏បានបង្ហាញពីការកើនឡើងហានិភ័យនៃការគាំងបេះដូង, ជំងឺបេះដូង, ជំងឺដាច់សរសៃឈាមខួរក្បាល, ជំងឺមហារីកសួត, ជំងឺរលាកទងសួត ក៏ដូចជាការថយចុះមុខងារសួតចំពោះកុមារដែលរស់នៅក្បែរផ្លូវដែលមានចរាចរណ៍ច្រើនផងដែរ។ ពួកគេក៏បានអំពាវនាវឱ្យអ្នកនយោបាយប្តេជ្ញាចាត់វិធានការ ដើម្បីកាត់បន្ថយស្ថានភាពបំពុលបរិយាកាសខុសច្បាប់នៅទូទាំងចក្រភពអង់គ្លេស ដើម្បីឆ្លើយតបតាមគោលការណ៍ណែនាំរបស់អង្គការសុខភាពពិភពលោក៕

អត្ថបទ៖ លីដា