លោកជំទាវ ចន ច័ន្ទលក្ខិណា នាំតារាចម្រៀង ស៊ឹម ថៃណា ទៅសុំជំនួយផ្នែកច្បាប់ បន្ទាប់ពីប្រកាសទុកពេល ២៤ម៉ោង មិនឃើញបុរសម្នាក់នោះចេញមុខមកសុំទោស
- BY
- srey nuch
- August 11, 2023
រាជធានីភ្នំពេញ៖ នៅយប់ថ្ងៃទី១០ ខែសីហា ឆ្នាំ២០២៣ម្សិលមិញនេះ យោងតាមការបង្ហោះពីគណនីហ្វេសប៊ុកផ្ទាល់របស់ លោកជំទាវ ចន ច័ន្ទលក្ខិណា ប្រធានសមាគមន៍សិល្បៈ បានបញ្ជាក់ថា «២៤ម៉ោងត្រូវបានបញ្ចប់ ដូច្នេះពួកយើងធ្វើតាមនីតិវិធីច្បាប់ គ្មានការសុំទោសទៀតទេ»។ ការបញ្ជាក់បែបនេះ បន្ទាប់ពី លោកជំទាវ បានប្រកាសទុកពេល ២៤ ដល់បុរសម្នាក់ ដែលបានជេរប្រមាថមើលងាយមកលើតារាចម្រៀង ស៊ឹម ថៃណា ចេញមកសុំទោសនៅចំពោះមុខ។
តាមរយៈការបង្ហោះរូបមួយសន្លឹកក្នុងគណនីហ្វេសប៊ុករបស់ លោកជំទាវ ចន ច័ន្ទលក្ខិណា បាននាំតារាចម្រៀង ស៊ឹម ថៃណា ទៅជួបលោកជំទាវ ញ៉ែម មរកត រដ្ឋលេខាធិការក្រសួងកិច្ចការនារី ដើម្បីដាក់ពាក្យប្តឹងបុរសម្នាក់ ដែលបានប្រមាថមើលងាយ ប្រើពាក្យសម្ដីធ្ងន់ៗ មកលើតារាចម្រៀងរូបនេះ ហាក់បីជាពុំអាចទទួលយកបាននោះទេ។ ការដាក់ពាក្យប្ដឹងនេះ ដោយសារតែបុរសដែលបានប្រមាថមើលងាយ មិនបានចេញមុខមកដោះស្រាយ និងសុំទោសនៅចំពោះមុខ បន្ទាប់ពីលោកជំទាវ បានដាក់ពេលឲ្យ២៤ម៉ោង ដើម្បីបញ្ចប់រឿង។
សូមបញ្ជាក់ថា តារាចម្រៀង ស៊ឹម ថៃណា បានឡាយវីដេអូក្នុងគណនីហ្វេសប៊ុកផ្ទាល់ខ្លួន បាននិយាយទាំងអួលដើមក ទឹកភ្នែកស្រក់មកឥតឈប់ បានរៀបរាប់ពីសកម្មភាព បុរសម្នាក់ដែលនាងមិនធ្លាប់ស្គាល់សោះ បានផឹកស៊ីស្រវឹងនៅក្នុងហាងដែលនាងច្រៀងកាលពីយប់ថ្ងៃទី០៦ ខែសីហា ឆ្នាំ២០២៣ ដោយប្រើពាក្យជេរប្រមាថ ហាក់បីដូចជានាង ជាស្រីខូច ឬស្រីលក់ខ្លួន នៅពេលដែលរូបនាងត្រូវបានអ្នកស្គាល់គ្នាអញ្ជើញឲ្យទៅអង្គុយកំដរក្បែរនោះ។ ភ្លាមៗនោះ តារាចម្រៀង ស៊ឹម ថៃណា ក៏បានឈ្លោះតបវិញដែរ ហើយក៏ដើរចេញ ព្រោះដោយមើលឃើញថា បុរសម្នាក់នោះស្រវឹងខ្លាំងហើយ។ តារាចម្រៀង ស៊ឹម ថៃណា បានបន្ថែមថា ពាក្យប្រមាថទាំងនេះ ទោះជានាងកើតក្នុងគ្រួសារអ្នកក្រ សូម្បីតែម្ដាយរបស់នាង បងប្អូន ឬមិត្តភក្ដិ ក៏មិនដែលប្រើពាក្យបែបនេះដាក់មកលើនាងឡើយ ៕
ប្រភព៖ Chanlakhena Chorn
- Share This Post: