អូស្ត្រាលីនឹងបិទច្រកព្រំដែនរវាងរដ្ឋ Victoria និង New South Wales បន្ទាប់ពីមានករណីជំងឺកូវីដ១៩ កើនឡើងខ្លាំងនៅក្នុងសហគមន៍

នៅថ្ងៃច័ន្ទ ទី០៦ ខែកក្កដា ឆ្នាំ២០២០ នាយករដ្ឋមន្រ្តីរដ្ឋ Victoria និង New South Wales បានប្រកាសថា នឹងបិទច្រកព្រំដែនទាំងអស់រវាងរដ្ឋទាំង ២ ចាប់ពីម៉ោង ១១ និង ៥៩នាទី យប់ថ្ងៃអង្គារ បន្ទាប់ពីមានកិច្ចពិភាក្សាជាមួយនាយករដ្ឋមន្រ្តីរបស់ប្រទេសអូស្ដ្រាលី គឺលោក Scott Morrison ។ ការសម្រេចនេះបានកើតឡើងនៅពេលដែលរដ្ឋ Victoria បានរកឃើញករណីជំងឺ COVID-19 ថ្មីៗរហូតដល់ទៅ ១២៧ ករណី ដែលវាជាតួលេខខ្ពស់បំផុតចាប់តាំងពីរដ្ឋមានករណីជំងឺនេះ។

ការសម្រេចចិត្តបិទព្រំដែនជាលើកដំបូងក្នុងរយៈពេល ១០០ឆ្នាំ ត្រូវបានធ្វើឡើងនៅឯពិធីភ្ជាប់ទំនាក់ទំនងពេលព្រឹករវាងនាយករដ្ឋមន្ត្រីរដ្ឋ Victoria លោក Daniel Andrews និងនាយករដ្ឋមន្រ្តីរដ្ឋ NSW លោក Gladys Berejiklian និងនាយករដ្ឋមន្ត្រីប្រទេសអូស្ត្រាលីលោក Scott Morrison នៅថ្ងៃច័ន្ទនេះ។ ដើមឡើយនៅរដ្ឋទាំង ២ ភាគច្រើនមានតែករណីនាំចូលប៉ុណ្ណោះ ប៉ុន្តែមួយរយៈចុងក្រោយនេះគឺ ៨០% ចេញពីសហគមន៍ ដែលវាជារឿងមួយនឹកស្មានមិនដល់នោះទេ៕

អត្ថបទ៖ លីដា
ប្រភព៖ The Sydney Morning Herald