ថៃគ្រោងជ្រើសរើសគ្រូអង់គ្លេសជនជាតិដើម ១០,០០០ នាក់បន្ថែមទៀត ឲ្យទៅបង្រៀននៅតាមសាលារដ្ឋ ដើម្បីឲ្យកូនសិស្សឆាប់ចេះប្រើភាសាអង់គ្លេស

ថៃ៖ យោងតាមការចុះផ្សាយនៅក្នុងសារព័ត៌មាន Bangkok Post បានឲ្យដឹងថា ក្រសួងអបរំនៃប្រទេសថៃគ្រោងនឹងជ្រើសរើសគ្រូបង្រៀនភាសាអង់គ្លេសដែលជាជនជាតិដើមនិយាយភាសាអង់គ្លេសចំនួន ១០,០០០ នាក់ ដើម្បីមកជួយបង្កើនសមត្ថភាពប្រើប្រាស់ភាសាបរទេសក្នុងចំណោមកូនសិស្សថៃ បន្ទាប់ពីស្ថានភាពនៅក្នុងប្រទេសមានសុវត្ថិភាពពីជំងឺឆ្លងកូវីដ ១៩។

គម្រោងខាងលើនេះត្រូវបានបង្ហាញជូនដោយលោក Nataphol Teepsuwan រដ្ឋមន្ត្រីក្រសួងអប់រំថៃនៅក្នុងឱកាសដែលរូបលោកបានទៅចូលរួមកិច្ចប្រជុំមួយនៅឯសមាគមន៍សាលាអន្តរជាតិក្នុងប្រទេសថៃ កាលពីថ្ងៃសុក្រ កន្លងទៅ។ លោករដ្ឋមន្រ្តីរូបនេះបានបញ្ជាក់ថា បច្ចុប្បន្នថៃមានគ្រូបរទេសបង្រៀនភាសាអង់គ្លេសចំនួន ៧,០០០ នាក់ហើយ តែចំនួននេះគឺមិនទាន់គ្រប់គ្រាន់ឡើយ ព្រោះថៃកំពុងតែអនុវត្តកម្មវិធីពង្រឹងភាសាអង់គ្លេសតាមសាលារដ្ឋនៅទូទាំងប្រទេសចាប់តាំងពីកម្រិតមត្តេយ្យសិក្សារហូតដល់វិទ្យាល័យ។

លោកបានបន្តថា ការសិក្សាភាសាបរទេសគឺជារឿងចាំបាច់បំផុតសម្រាប់ក្មេងៗជំនាន់ក្រោយ ដើម្បីឆ្លើយតបទៅនឹងទីផ្សារការងារនិងសង្គមក្នុងសម័យសាកលភាវូបនីយកម្ម ហើយពេលវេលាដែលល្អនិងងាយរៀនភាសាបំផុតនោះគឺរាប់ចាប់តាំងពីពេលមនុស្សម្នាក់បានកើតរហូតដល់អាយុ ៧ ឆ្នាំ។ លោក Nataphol Teepsuwan បានប្រាប់អ្នកសារព័ត៌មានថា រហូតមកទល់នឹងពេលនេះលោកបានធ្វើការងារជាមួយស្ថានទូតនៃប្រទេសដែលមានភាសាដើមអង់គ្លេសនិងកំពុងមានវត្តមាននៅក្នុងប្រទេសថៃជាច្រើនរួចហើយ ដើម្បីឲ្យស្ថានទូតទាំងនោះជួយបញ្ជូនគ្រូអង់គ្លេសមកកាន់ប្រទេសថៃ ហើយប្រទេសមួយគេរំពឹងថានឹងអាចមានគ្រូអង់គ្លេសច្រើននោះគឺប្រទេសកាណាដា ព្រោះកន្លងមកកាណាដាធ្លាប់បញ្ជូនគ្រូអង់គ្លេសជាច្រើននាក់ទៅកាន់ប្រទេសជប៉ុនរួចហើយ។ ក្រៅតែពីអនុវត្តគម្រោងពង្រឹងភាសាអង់គ្លេស ថៃក៏មានគម្រោងបង្រៀនភាសាចិនទៅកាន់សិស្សសាលាផងដែរ  ព្រោះបច្ចុប្បន្នភាសាចិនក៏កំពុងមានតម្រូវការខ្ពស់ណាស់ដែរ៕

អត្ថបទ៖ ភក្តី

ប្រភព៖ Bangkok Post