សៀវភៅដ៏មានតម្លៃប្រហែល ២០០ក្បាល រួមទាំងការបោះពុម្ពស្នាដៃដំបូង (first edition) ពីសតវត្សរ៍ទី១៧ ដោយបិតាតារាវិទូ កាលីលេអូ កាលីលេ និងរូបវិទូ អ៊ីសាក ញូតុន ត្រូវបានគេរកឃើញពីក្រោមផ្ទះមួយនៅឯប្រទេសរ៉ូម៉ានី។ សៀវភៅទាំងនេះត្រូវបានគេលួចតាំងតែពីឆ្នាំ២០១៧ ចេញពីឃ្លាំងមួយនៅភាគខាងលិចទីក្រុងឡុង ប្រទេសអង់គ្លេស ដែលជាកន្លែងដែលសៀវភៅទាំងនេះត្រូវបានរក្សាទុកជាបណ្តោះអាសន្ន មុនពេលត្រូវដាក់ដេញថ្លៃនៅក្នុងកម្មវិធីមួយ ដែលគ្រោងធ្វើនៅសហរដ្ឋអាមេរិក។

ប៉ូលីសបាននិយាយថា ក្រុមចោរបានគេចពីឧបករណ៍ចាប់សញ្ញា ដោយបានចូលឃ្លាំងស្តុកសៀវភៅតាមដំបូល និងលួចយកសៀវភៅដ៏មានតម្លៃ និងកម្រ មានតម្លៃប្រមាណ ៣.២ លានដុល្លារ ទាំងអស់នេះ។ ករណីនេះបាននាំឱ្យប៉ូលីសនៅអង់គ្លេស អ៊ីតាលី និងរ៉ូម៉ានី ដោយមានការគាំទ្រពីភ្នាក់ងារប៉ូលីសសហភាពអឺរ៉ុប Europol បានវាយឆ្មក់ទីតាំងចំនួន ៤៥ នៅក្នុងប្រទេសទាំង៣ កាលពីឆ្នាំមុន។ ការស៊ើបអង្កេតក៏បាននាំឱ្យមានការចាប់ខ្លួន និងចោទប្រកាន់មនុស្សចំនួន ១៣នាក់ ដែលជាប់ទាក់ទងនឹងក្រុមឧក្រិដ្ឋកម្មរ៉ូម៉ានី ចំពោះការជាប់ពាក់ព័ន្ធនេះនៅចន្លោះឆ្នាំ២០១៦ និង ២០១៩ ៕

អត្ថបទ​៖ លីដា
ប្រភព៖ NHK