យ៉ាងហោចណាស់មនុស្ស ១៦នាក់បានស្លាប់ ដោយសារការពុលកាបូនម៉ូណូអុកស៊ីតនៅក្នុងអណ្តូងរ៉ែធ្យូងថ្មរបស់ចិន

យោងតាមការចុះផ្សាយរបស់សារព័ត៌មាន Channel news Asia បានឱ្យដឹងថា កម្មករចំនួន ១៦នាក់ បានស្លាប់ និងម្នាក់ទៀតស្ថិតក្នុងស្ថានភាពធ្ងន់ធ្ងរ បន្ទាប់ពីបានជាប់នៅក្នុងអណ្តូងរ៉ែធ្យូងថ្មមួយ នៅភាគនិរតីនៃប្រទេសចិន កាលពីថ្ងៃអាទិត្យ ទី២៧ ខែកញ្ញា។ ស៊ីនហួដែលបានដកស្រង់សំដីរបស់រដ្ឋាភិបាលបាននិយាយថា ខ្សែក្រវ៉ាត់ conveyor របស់វាបានឆាបឆេះនៅព្រឹកព្រលឹម ដែលបានបង្កើតនូវកម្រិតកាបូនម៉ូណូអុកស៊ីតធ្វើឱ្យមានការពុល។ ក្រុមអ្នកជួយសង្គ្រោះក៏កំពុងបន្ដស្វែងរកអ្នកនៅរស់រានបន្ដផងដែរ។

រដ្ឋាភិបាលស្រុក Qijiang បាននិយាយនៅលើប្រព័ន្ធផ្សព្វផ្សាយសង្គម Weibo ថា មូលហេតុនៃគ្រោះថ្នាក់នេះកំពុងស្ថិតក្នុងការស៊ើបអង្កេតនៅឡើយទេ។ រោងចក្រនេះមានឈ្មោះថា Songzao Coal Mine គឺជាកម្មសិទ្ធិរបស់ក្រុមហ៊ុនថាមពលរដ្ឋ Chongqing Energy ហើយមានទីតាំងនៅខាងក្រៅទីក្រុង Chongqing ។ គ្រោះថ្នាក់នៃការរុករករ៉ែគឺជារឿងធម្មតានៅក្នុងប្រទេសចិន ដែលឧស្សាហកម្មនេះមានកំណត់ត្រាសុវត្ថិភាពអន់ ហើយបទប្បញ្ញត្តិជាញឹកញាប់ត្រូវបានអនុវត្តដោយខ្វះការយកចិត្តទុកដាក់៕

អត្ថបទ៖ លីដា
ប្រភព៖ Channel News Asia