លោក ដូណាល់ ត្រាំ បាននិយាយថា គាត់នឹងឈ្នះឆ្នោតយ៉ាងងាយ ប្រសិនបើជាការបោះឆ្នោតស្របច្បាប់

ប្រធានាធិបតីអាមេរិកលោក ដូណាល់ ត្រាំ នៅយប់ថ្ងៃព្រហស្បតិ៍ ទី០៥ ខែវិច្ឆិកា បាននិយាយទាំងគ្មានភស្តុតាងថា ប្រសិនបើសន្លឹកឆ្នោតត្រឹមត្រូវ «ស្របច្បាប់» ត្រូវបានគេរាប់បញ្ចូល លោកនឹងឈ្នះការបោះឆ្នោតប្រធានាធិបតីយ៉ាងងាយ។ នៅក្នុងការបង្ហាញខ្លួនតាមកញ្ចក់ទូរទស្សន៍លោក ដូណាល់ ត្រាំ បាននិយាយថា៖«ប្រសិនបើអ្នករាប់សន្លឹកឆ្នោតពិតខ្ញុំនឹងឈ្នះដោយងាយ។ ប្រសិនបើអ្នករាប់សន្លឹកឆ្នោតខុសច្បាប់ ពួកគេអាចព្យាយាមលួចការបោះឆ្នោតពីយើង ពីអ្នកដែលមកបោះឆ្នោតយឺត»។

លោកបាននិយាយថា៖ «យើងកំពុងតាមមើលពួកគេយ៉ាងយកចិត្តទុកដាក់ ប៉ុន្តែសម្លេងឆ្នោតជាច្រើនបានមកយឺត»។ គាត់ក៏បាននិយាយផងដែរថា គាត់បានឈ្នះរដ្ឋសំខាន់ៗជាច្រើនរួចទៅហើយ ដោយរាប់បញ្ចូលទាំងជ័យជំនះដ៏ធំធេងផងដែរ នៅក្នុងរដ្ឋ Florida រដ្ឋ Iowa រដ្ឋ Indiana និងរដ្ឋ Ohio ។ នៅឯសន្និសីទកាសែតសេតវិមានលោក ដូណាល់ ត្រាំ បាននិយាយថា៖«យើងបានឈ្នះរដ្ឋទាំងនេះ និងជ័យជំនះជាច្រើនទៀត ទោះបីជាមានការជ្រៀតជ្រែកក្នុងការបោះឆ្នោតជាប្រវត្តិសាស្ត្រដោយលុយធំ ប្រព័ន្ធផ្សព្វផ្សាយនិងបច្ចេកវិទ្យាធំក៏ដោយ»។

អត្ថបទ៖ លីដា
ប្រភព៖ Channel News Asia