សកម្មជនការពារបរិស្ថាន Greta Thunberg បានចំអកលោក ដូណាល់ ត្រាំ បន្ទាប់ពីគាត់ទាមទារឱ្យបញ្ឈប់ការរាប់សន្លឹកឆ្នោត

សកម្មជនការពារបរិស្ថាន Greta Thunberg បាននិយាយចំអកទៅលោក ដូណាល់ ត្រាំ កាលពីយប់ថ្ងៃព្រហស្បតិ៍នេះ ខណៈពេលដែលលោកប្រធានាធិបតី កំពុងតែក្រពុលមុខនៅមិនសុខក្នុងខ្លួន ព្រោះតែលោក ចូ បាយដិន ដែលជាគូប្រជែងកំពុងមានសំឡេងនាំមុខ។ នៅក្នុងបណ្ដាញសង្គម Twitter លោក ដូណាល់ ត្រាំ បានសរសេរថា៖«បញ្ឈប់ការរាប់សន្លឹកឆ្នោត» ដោយសារតែលោកគិតថាមានការក្លែងបន្លំនៅក្នុងការបោះឆ្នោតនេះ។ ចំណែកឯសកម្មជនវ័យ ១៧ឆ្នាំ Greta Thunberg ក៏បានប្រាប់ទៅលោកវិញថាឱ្យត្រជាក់ចិត្តខ្លះទៅ។

សកម្មជនបរិស្ថាន Greta Thunberg បានសរសេរថា៖«វាគួរឱ្យអស់សំណើចណាស់។ លោក ដូណាល់ ត្រូវចេះរៀនគ្រប់គ្រងកំហឹងរបស់គាត់ បន្ទាប់មកទៅមើលខ្សែភាពយន្តបែបចាស់ៗជាមួយមិត្តណាម្នាក់! ស្ងប់ចិត្តទៅដូណាល់ ស្ងប់ចិត្តទៅ!»

ការពិតទៅសាររបស់ Greta Thunberg គឺធ្វើត្រាប់តាមអ្វីដែលលោក ដូណាល់ ត្រាំ ធ្លាប់សរសេរឱ្យនាងផ្ទាល់តែម្ដង ដោយសារកាលពីថ្ងៃទី១២ ខែធ្នូ ចុងឆ្នាំ២០១៩ គឺលោកប្រធានាធិបតីបានចំអកឱ្យនាងបែបនោះ នៅពេលដែលនាងបានក្លាយជាបុគ្គលប្រចាំឆ្នាំរបស់ Time Magazine ៕

អត្ថបទ៖ លីដា
ប្រភព៖ Daily Mail