លោក ដូណាល់ ត្រាំ បាននិយាយថា លោក ចូ បាយដិន មិនគួរហៅខ្លួនឯងថាជា «ប្រធានាធិបតីថ្មី» នោះទេ ព្រោះលោកក៏អាចនិយាយបែបនោះបានដែរ

យោងតាមការចុះផ្សាយរបស់សារព័ត៌មាន Channel News Asia នៅថ្ងៃសៅរ៍នេះបានឱ្យដឹងថា ប្រធានាធិបតីអាមេរិកលោក ដូណាល់ ត្រាំ នៅថ្ងៃសុក្រ ទី០៦ ខែវិច្ឆិកា (ម៉ោងអាមេរិក) បានប្រាប់គូប្រជែងរបស់លោក គឺលោក ចូ បាយដិន ថា «កុំទាន់ចេះតែគិត» ថាខ្លួនអាចត្រឡប់ទៅកាន់សេតវិមានក្នុងនាមជាប្រធានាធិបតីថ្មី ទាំងដែលការពិតគឺលោក ចូ បាយដិន បានវ៉ាដាច់សំឡេងគាត់យ៉ាងច្រើនក៏ដោយ។

លោក ដូណាល់ ត្រាំ បានសរសេរនៅលើបណ្ដាញសង្គម Twitter ថា៖«លោក ចូ បាយដិន មិនគួរអះអាងថា ការិយាល័យប្រធានាធិបតីជារបស់ខ្លួនដោយមិនត្រឹមត្រូវនោះទេ។ ខ្ញុំក៏អាចនិយាយបែបនោះបានដែរ។ នីតិវិធីច្បាប់កំពុងតែចាប់ផ្តើមហើយ!»

ជាក់ស្ដែងលោក ដូណាល់ ត្រាំ ផ្ទាល់ក៏ធ្លាប់បានអះអាងម្តងហើយម្តងទៀតថា លោកបានឈ្នះការបោះឆ្នោតនៅថ្ងៃអង្គារនេះ បើទោះបីជាចំនួនរាប់សន្លឹកឆ្នោតចង្អុលបង្ហាញយ៉ាងច្បាស់ថា លោកបានក្លាយជាប្រធានាធិបតីត្រឹមមួយអាណត្តិក៏ដោយ៕

អត្ថបទ៖ លីដា
ប្រភព៖ Channel News Asia