អាវយឺត «Hand of God» របសកំពូលកីឡាករ Diego Maradona ត្រូវបានដាក់លក់ក្នុងតម្លៃ ២ លានដុល្លារអាមេរិក នៅប្រទេសអង់គ្លេស

អង់គ្លេស៖ អាវយឺតមួយរបស់អតីតកំពូលកីឡាករបាល់ទាត់លំដាប់ពិភពលោក Diego Maradona ត្រូវបានដាក់លក់ក្នុងតម្លៃ ២ លានដុល្លារ នៅឯទីក្រុងឡុងដ៍ ប្រទេសអង់គ្លេស នេះបើយោងតាមការចុះផ្សាយរបស់សារព័ត៌មាន  Channel News Asia នៅថ្ងៃសៅរ៍ ទី២៨ ខែវិច្ឆិកា ឆ្នាំ២០២០។ អាវយឺតមួយនេះត្រូវគេបានគេដាក់ឈ្មោះថា «Hand of God» ដែល​វីរបុរសបាល់ទាត់ Diego Maradona បានពាក់ក្នុងអំឡុងការប្រកួតបាល់ទាត់ ដែលលោកបានជួយឲ្យអាហ្សង់ទីនឈ្នះពាន រង្វាន់ពិភពលោក World Cup កាលពីឆ្នាំ១៩៨៦ ដោយកាលនោះម៉ិកស៊ិកគឺជាម្ចាស់ផ្ទះ។

សុំរម្លឹកជូនអំពីប្រវត្តិនៃពាក្យ «Hand of God» ឬជាខេមរៈភាសាមានន័យថា «ដៃព្រះជាម្ចាស់» បន្តិចថា ពាក្យនេះបានកើតឡើងក្រោយពេលបិទបញ្ចប់ព្រឹត្តិការណ៍បាល់ទាត់ World Cup ដែលបានរៀបចំឡើងនៅក្នុងប្រទេសម៉ិកស៊ិកកាលពីឆ្នាំ១៩៨៦ ដោយពេលនោះអាហ្សង់ទីន គឺជាម្ចាស់ជើងឯង ហើយកីឡករ Diego Maradona​​ នេះហើយ ដែលជាកីឡករឆ្នើមមួយរូបក្នុងការជួយឲ្យអាហ្សង់ទីនឈ្នះពានដ៏ធំមួយនេះជាប្រវត្តិសាស្រ្ត។

គេនៅចាំបានថា នៅក្នុងការប្រកួតរវាងអាហ្សង់ទីន និងអង់គ្លេសក្នុងវគ្គ ៨ ក្រុមចុងក្រោយ លោក Diego Maradona​​ រកគ្រាប់បាលបាន ២ គ្រាប់ជួយឲ្យអាហ្សង់ទីឈ្នះអង់គ្លេសក្នុងលទ្ធផល ២-១ ហើយក្នុងនោះគ្រាប់ជ័យជំនះមួយគ្រាប់របស់គាត់ គឺគាត់បានបន្លំយកដៃទះបញ្ចូលទី តែភ្លាមៗនៅក្នុងការប្រកួតអាជ្ញាកណ្តាលមិនបានមើលឃើញឡើយ។ តាមរយៈជ័យជំនះនេះអាហ្សង់ក៏បន្តឡើងទៅវគ្គបន្តបន្ទាប់ និងឈ្នះជើងឯងតែម្តង ហើយក្រោយមកទើបគេបានមើលឃើញពីសកម្មភាពបន្លំយកដៃទះបាល់បញ្ចូលទីរបស់លោក Diego Maradona ហើយពិភពលោកក៏បានហៅវាថា «Hand of God» ឬ «ដៃរបស់ព្រះជាម្ចាស់» តាំងពីពេលនោះមក៕

អត្ថបទ៖ ភក្តី
ប្រភព៖ Channel News Asia