លោក ចូ បៃដិន បាននិយាយថា លោកនឹងនៅតែរក្សាការដាក់ពន្ធរបស់រដ្ឋបាលលោក ដូណាល់ ត្រាំ ទៅលើទំនិញចិនឱ្យនៅដដែល

ប្រធានាធិបតីជាប់ឆ្នោតអាមេរិកលោក ចូ បៃដិន បានបញ្ជាក់ថា សម្រាប់ពេលនេះលោកនឹងរក្សាការដាក់ពន្ធរបស់រដ្ឋបាលលោក ដូណាល់ ត្រាំ ដែលបានដាក់លើទំនិញនាំចូលរបស់ចិនឱ្យនៅដដែល។ លោក ចូ បៃដិន បានប្រាប់កាសែតញូវយ៉កថែមស៍ថា លោកនឹងមិនចាត់វិធានការបន្ទាន់ណាមួយឡើយចំពោះបញ្ហានេះ។ រំលឹកដែរថាប្រធានាធិបតីលោក ដូណាល់ ត្រាំ បានដាក់ពន្ធលើទំនិញរហូតដល់ ២៥% លើផលិតផលពីប្រទេសចិន។ ក្នុងនោះប្រទេសចិនក៏មានកិច្ចព្រមព្រៀងក្នុងការទិញផលិតផលកសិកម្មដ៏ច្រើនរបស់អាមេរិកផងដែរ។

លោក ចូ បៃដិន បាននិយាយថា លោកនឹងបន្តគោលនយោបាយពាណិជ្ជកម្ម ដែលពិតជាមានការរីកចម្រើន ទៅលើការរំលោភបំពានណាមួយរបស់ប្រទេសចិន។ លោកក៏បានលើកឡើងពីការលួចកម្មសិទ្ធិបញ្ញា និងការឧបត្ថម្ភធនខុសច្បាប់ដល់សាជីវកម្ម ពីសំណាក់ប្រទេសចិនផងដែរ។ ប្រធានាធិបតីជាប់ឆ្នោតបាននិយាយថា «យុទ្ធសាស្ត្រចិនល្អបំផុត» គឺធ្វើឱ្យសម្ព័ន្ធមិត្តអាមេរិកទាំងអស់ «នៅលើទំព័រតែមួយ» ។ លោកបាននិយាយថា ការកសាងសម្ព័ន្ធភាពបែបនេះនឹងក្លាយជាអាទិភាព នៅក្នុងសប្តាហ៍ដំបូងនៃការកាន់តំណែងផ្លូវការរបស់លោកឆាប់ៗ៕

អត្ថបទ៖ លីដា
ប្រភព៖ NHK