BREAKING NEWS! រដ្ឋបាលចំណីអាហារនិងឪសថអាមេរិក បានអនុម័តការប្រើប្រាស់វ៉ាក់សាំងរបស់ក្រុមហ៊ុន Pfizer និង BioNTech ជាផ្លូវការ

យោងតាមការចុះផ្សាយរបស់សារព័ត៌មាន USA Today នៅថ្ងៃសៅរ៍ ទី១២ ខែធ្នូ ឆ្នាំ២០២០ បានឱ្យដឹងថា រដ្ឋបាលចំណីអាហារនិងឪសថអាមេរិក (FDA) នៅយប់ថ្ងៃសុក្រ (ម៉ោងនៅអាមេរិក) បានយល់ព្រមអនុញ្ញាតឱ្យមានការប្រើប្រាស់វ៉ាក់សាំងបង្ការជំងឺ COVID-19 ដែលត្រូវបានបង្កើតឡើងដោយក្រុមហ៊ុនឱសថអាមេរិក Pfizer និងដៃគូអាល្លឺម៉ង់របស់ខ្លួនគឺក្រុមហ៊ុន BioNTech ជាផ្លូរការ នៅក្នុងអ្វីដែលគេសង្ឃឹមថា ជាការចាប់ផ្តើមនៃការបញ្ចប់នៃការរីករាលដាលនៃជំងឺរាតត្បាត COVID-19 នៅសហរដ្ឋអាមេរិក។ វ៉ាក់សាំងដែលជាការសហការគ្នារវាងក្រុមហ៊ុនទាំង ២ ត្រូវបានគេមើលឃើញថា មានសុវត្ថិភាពល្អ និងប្រសិទ្ធភាពខ្ពស់។

វាត្រូវបានគេផលិតលឿនជាងវ៉ាក់សាំងណាទាំងអស់ ដែលត្រូវបានអនុម័តពីមុននៅសហរដ្ឋអាមេរិក ដោយសារថាវ៉ាក់សាំងបានប្រើប្រាស់ការចំណាយរាប់ពាន់លានដុល្លារ និងវិទ្យាសាស្រ្តសម័យទំនើបរួមបញ្ចូលគ្នា។ វ៉ាក់សាំងនេះអាចចាប់ផ្តើមចែកចាយទៅក្នុងដៃពលរដ្ឋភ្លាមៗនៅថ្ងៃច័ន្ទដើមសប្ដាហ៍ក្រោយយ៉ាងយូរបំផុត ហើយបុគ្គលិកថែទាំសុខភាពជួរមុខប្រមាណ ២.៩ លាននាក់ និងអ្នករស់នៅតាមមណ្ឌលថែទាំ ត្រូវបានរំពឹងថា នឹងទទួលវ៉ាក់សាំងនេះក្នុងរយៈពេលប៉ុន្មានថ្ងៃដំបូង។ ចំណែកវ៉ាក់សាំងជាច្រើនទៀតនឹងត្រូវដាក់ឱ្យប្រើប្រាស់នៅប៉ុន្មានសប្តាហ៍ និងប៉ុន្មានខែខាងមុខនេះ៕

អត្ថបទ៖ លីដា
ប្រភព៖ USA Today