យុវជនបែកថ្នាំម្នាក់យកម៉ាស៊ីនកាត់ឈើមកកាត់កខ្លួនឯងបណ្តាលអោយស្លាប់
បាត់ដំបង ៖ ករណីអត្តឃាតដ៏គួរអោយរន្ធត់មួយបានកើតឡើង ដោយ យុវជនប្រើប្រាស់គ្រឿងញៀនម្នាក់បានបែកថ្នាំយកម៉ាស៊ីនកាត់ឈើមកកាត់កខ្លួនឯងបណ្តាលអោយស្លាប់ក្នុងថ្លុកឈាម នៅចំណុចភូមិ អូរល្មូន ឃុំផ្លូវមាស ស្រុករតនមណ្ឌល។ លោកវរសេនីយ៍ឯក សន.និល អធិការនគរបាលស្រុករតនមណ្ឌល បានអោយដឹងថា នៅថ្ងៃសៅរ៍ ០៣រោច ខែបឋមាសាឍ ឆ្នាំច សំរឺទ្ធិស័ក ព.ស ២៥៦២ ត្រូវនឹងថ្ងៃទី៣០ ខែមិថុនា ឆ្នាំ២០១៨ វេលាម៉ោង១៦និង៤២នាទី មានករណីអត្តឃាតមួយកើតឡើង ជនរង គ្រោះឈ្មោះ វ៉ាត.អ៊ុត ភេទប្រុស អាយុ ២០ឆ្នាំ រស់នៅភូមិអូរល្មូន ឃុំផ្លូវមាស ស្រុករតនមណ្ឌល ដោយយកម៉ាស៊ីនកាត់ឈើមក កាត់ករខ្លួនឯងបណ្តាលអោយស្លាប់ភ្លាមៗនៅកន្លែងកើតហេតុ។
ដោយឆ្លងតាមការចុះត្រួតពិនិត្យនៅកន្លែងកើតហេតុ និងសាកសព របស់ជនគ្រោះឈ្មោះ វ៉ាត.អ៊ុត សមត្ថកិច្ចអាចសន្និដ្ឋានបានថាជនរង គ្រោះពិតជាបានប្រើប្រាស់គ្រឿងញៀនហើយយកម៉ាស៊ីនកាត់ឈើមកកាត់ករខ្លួនឯងស្លាប់ពិតប្រាកដមែន។ បច្ចុប្បន្នសាកសពជនរងគ្រោះត្រូវបានគ្រួសារយកទៅធ្វើពិធីបុណ្យ សពតាមប្រពៃណីទំនៀមទំលាប់ខ្មែរ ៕
ប្រភព៖ អគ្គស្នងការដ្ឋាននគរបាលជាតិ