ក្រុមនាវិកនិងទាហ៊ានជើងទឹកថៃជិត ៣០០ នាក់ ត្រូវបានដាក់ឲ្យធ្វើចត្តាឡីស័កភ្លាមៗ ក្រោយមានទាហាន ២នាក់ឆ្លងជំងឺកូវីដ១៩

ថៃ៖ ក្រុមនាវិកនិងទាហ៊ានជើងទឹកថៃជិត ៣០០ នាក់ ត្រូវបានដាក់ឲ្យធ្វើចត្តាឡីស័ករយៈពេល ១៤ថ្ងៃ នៅឯមជ្ឈមណ្ឌលហ្វឹកហ្វឺនទាហានជើងទឹកក្នុងខេត្ត Chon Buri ភាគខាងលិចប្រទេសថៃ បន្ទាប់ពីមានទាហាន ២នាក់ នៅក្នុងអង្គភាពមួយនេះបានធ្វើតេស្តវិជ្ជមានជំងឺ COVID-19 ។ បើយោងតាមលោក Chettha Jaipiem ដែលជាអ្នកនាំពាក្យឲ្យអង្គភាពកងទ័ពជើងទឹកថៃតាមរយៈសារព័ត៌មាន បាងកកប៉ុស្តិ៍ បានឲ្យដឹងថា ចំណាត់ការខាងលើនេះត្រូវបានធ្វើឡើងភ្លាមៗ បន្ទាប់ពីអាជ្ញាធរសុខាភិបាលបានរកឃើញថា មានទាហានជើងទឹកចំនួន ១១ នាក់ បានទៅបរិភោគអាហារនៅក្នុងភោជនីយដ្ឋានមួយកន្លែង ដែលជាទីតាំងផ្ទុះឡើងនៃជំងឺ COVID-19 ។

ក្រោយទទួលបានដំណឹងនេះ មានទាហានចំនួន ២នាក់ ក្នុងចំណោមទាហានទាំង ១១នាក់ ដែលបានទៅបរិភោគអាហារនៅភោជនីយដ្ឋាននោះ បានតេស្ដវិជ្ជមានជាមួយជំងឺ COVID-19 ភ្លាម ខណៈមកទល់នឹងពេលនេះមានទាហាន និងនាវិកសរុបចំនួន ២៧៣នាក់ កំពុងតែធ្វើចត្តាឡីស័ក និងស្ថិតក្រោមការតាមដានសុខភាពយ៉ាងហ្មត់ចត់ពីក្រុមគ្រូពេទ្យ។ គួរបញ្ជាក់ជូនថា គិតត្រឹមពេលនេះថៃបានរកឃើញអ្នកជំងឺ COVID-19 សរុបនៅចំនួន ១០,៨៣៤ ករណី និងមានអ្នកស្លាប់សរុប ៦៧នាក់ ខណៈជំងឺ COVID-19 ដែលបានផ្ទុះចេញពីខេត្តសាមុតសាខននោះ កំពុងបន្តរាតត្បាតដល់ខេត្ត-ក្រុងចំនួន ៥៨ រួចហើយ នៅទូទាំងប្រទេសថៃ៕

អត្ថបទ៖ ភក្តី

ប្រភព៖ បាងកកប៉ុស្តិ៍