អាជ្ញាធរបាននិយាយថា យ៉ាងហោចណាស់មានមនុស្ស ៧៧នាក់ បានស្លាប់ និង ៧៤៣នាក់ បានរងរបួស បន្ទាប់ពីមានការរញ្ជួយដីកម្រិត ៦.២ រ៉ិចទ័រ បានវាយប្រហារខេត្ត Sulawesi ភាគខាងលិច របស់ឥណ្ឌូនេស៊ីកាលពីថ្ងៃសុក្រ។ ចាប់តាំងពីមានគ្រោះរញ្ជួយដីនោះរួចមក ក្រុមអ្នកជួយសង្គ្រោះនៅ Majene និងទីប្រជុំជនខេត្ត Mamuju បានប្រញាប់ប្រញាល់ស្វែងរកអ្នកដែលអាចនៅរស់រានមានជីវិត ដែលការសង្គ្រោះនឹងត្រូវបញ្ចប់នៅព្រឹកថ្ងៃច័ន្ទនេះ បន្ទាប់ពីការស្វែងរករយៈពេល ៧២ម៉ោង កន្លងមក។

មន្ដ្រីកំពុងប្រើឆ្កែសង្គ្រោះដើម្បីស្វែងរកមនុស្សដែលជាប់នៅក្រោមអគារបាក់រលំ ប៉ុន្តែការខ្វះខាតឧបករណ៍ធុនធ្ងន់កំពុងរារាំងប្រតិបត្តិការ ខណៈដែលការមកដល់នៃគ្រឿងជំនួយពីតំបន់ផ្សេងៗ ត្រូវបានពន្យារពេលដោយសារផ្លូវថ្នល់ត្រូវបានកាត់ផ្តាច់។ គួរឱ្យដឹងដែរថា ឥណ្ឌូនេស៊ីក៏ជាប្រទេសដែលមានចំនួនករណីស្លាប់ និងឆ្លងជំងឺ COVID-19 ច្រើនបំផុតខ្ពស់បំផុតនៅអាស៊ីអាគ្នេយ៍ ដូច្នេះការបង្ការការឆ្លងក្នុងចំណោមជនភៀសខ្លួនពីកន្លែងរងគ្រោះជិត ២៨ ០០០ នាក់ និងស្បៀងអាហារ គឺជាបញ្ហាប្រឈមបន្ទាប់ពីនេះទៀត៕

អត្ថបទ៖ លីដា
ប្រភព៖ NHK