រដ្ឋបាលក្រុងបាងកក (BMA) បានបើកមជ្ឈមណ្ឌលចត្តាឡីស័កថ្មីមួយ នៅឯស្ថានីយរថភ្លើង Bang Sue Grand ក្នុងសង្កាត់ Chatuchak នៅថ្ងៃអង្គារ ទី១៧ ខែសីហា ឆ្នាំ២០២១ នេះបើតាមការចុះផ្សាយរបស់សារព័ត៌មាន The Nation Thailand ។ វាគឺជាមជ្ឈមណ្ឌលចត្តាឡីស័កទី៣ សម្រាប់អ្នកជំងឺ COVID-19 ដែលមានរោគសញ្ញាស្រាលៗ ជាមួយនឹងសមត្ថភាពផ្ទុក ៤០០ នាក់ ដោយមានស្ត្រី ២០០ នាក់ និងបុរស ២០០​ នាក់ ហើយមន្ទីរពេទ្យ Thonburi Bamrungmuang គឺជាអ្នកទទួលខុសត្រូវក្នុងការមើលថែរក្សាពួកគេ។

មជ្ឈមណ្ឌលនេះត្រូវបានបំពាក់ដោយកន្លែងពិនិត្យអ្នកជំងឺ សេវាកម្មម្ហូបអាហារនិងភេសជ្ជៈ ប្រព័ន្ធសន្តិសុខ បន្ទប់ទឹក និងប្រព័ន្ធគ្រប់គ្រងកាកសំណល់។ ទន្ទឹមនឹងនេះដែរ មជ្ឈមណ្ឌលនឹងចាត់ចែងគ្រែ មុង កន្សែង សាប៊ូដុសខ្លួន ថ្នាំដុសធ្មេញ ម៉ាសបិទមុខ និងជែលលាងដៃ សម្រាប់អ្នកជំងឺ COVID-19 ផងដែរ។ ជម្រាបដែរថា គិតមកទល់នឹងពេលនេះ BMA បានដំណើរការមជ្ឈមណ្ឌលចត្តាឡីស័កចំនួន ៦៩ នៅទូទាំងរាជធានីបាងកក ដើម្បីផ្ទុកអ្នកជំងឺឱ្យបាន ៩,១៩០ នាក់ ហើយក្នុងនោះមានមជ្ឈមណ្ឌលចំនួន ៧ កំពុងដំឡើងទៅជាកន្លែងព្យាបាលអ្នកជំងឺ COVID-19 ប្រភេទស្រាលៗ ដើម្បីជួយសម្រាលបន្ទុកតាមមន្ទីរពេទ្យ ខណៈដែលចំនួនអ្នកឆ្លងជំងឺ COVID-19 នៅក្នុងទីក្រុងមានការកើនឡើងជាលំដាប់៕

អត្ថបទ៖ លីដា
ប្រភព៖ The Nation Thailand