យ៉ាងហោចណាស់មានមនុស្សចំនួន ២១ នាក់បានស្លាប់ និងប្រហែល ២០ នាក់កំពុងបាត់ខ្លួន ខណៈដែលទីក្រុង និងទីប្រជុំជននៅភាគខាងត្បូងសហរដ្ឋអាមេរិក ត្រូវបានរងគ្រោះដោយភ្លៀងធ្លាក់ខ្លាំង និងទឹកជំនន់កាលពីចុងសប្តាហ៍។ ភ្លៀងធ្លាក់យ៉ាងគំហុកនៅស្រុក Humphreys ក្នុងរដ្ឋ Tennessee ភាគខាងត្បូងកាលពីថ្ងៃសៅរ៍ បានធ្វើឱ្យមានការជន់លិចផ្ទះ និងខូចខាតផ្លូវយ៉ាងធ្ងន់ធ្ងរ ខណៈអាជ្ញាធរកំពុងស្វែងរកអ្នកបាត់ខ្លួន និងជួសជុលផ្លូវដែលខូចខាត។

ចំណែកឯនៅភាគឦសានរបស់សហរដ្ឋអាមេរិក ព្យុះត្រូពិចបានធ្វើឱ្យបាក់ដីនៅរដ្ឋ Rhode​ ហើយភ្លៀងធ្លាក់ខ្លាំង និងខ្យល់កន្ត្រាក់ បានបណ្តាល​ឱ្យមានការដាច់ចរន្តអគ្គិសនី ប៉ះពាល់ដល់អ្នកស្រុកប្រមាណ ១០ ម៉ឺនគ្រួសារ។ ភ្លៀងធ្លាក់ខ្លាំង ក៏បានធ្វើឱ្យជន់លិចផ្លូវមួយចំនួននៅក្នុងរដ្ឋ New York និង New Jersey ផងដែរ។ ជាមួយគ្នានេះ ប្រធានាធិបតីលោក ចូ បៃដិន ក៏បានចូលរួមរំលែកទុក្ខដល់ជនរងគ្រោះនៅរដ្ឋ Tennessee ហើយលោកនឹងប្ដេជ្ញាផ្តល់ការគាំទ្រដល់តំបន់ដែលរងគ្រោះដោយភ្លៀងធ្លាក់ខ្លាំងទាំងនេះ៕

អត្ថបទ៖ លីដា
ប្រភព៖ NHK