យោងតាមការចុះផ្សាយរបស់សារព័ត៌មាន The Straits Times នៅថ្ងៃច័ន្ទ ទី០៦ ខែកញ្ញា ឆ្នាំ២០២១ បានរាយការណ៍ថា យន្តហោះ Boeing 737 Max នឹងអាចហោះហើរចេញ/ចូល ប្រទេសសិង្ហបុរីសារជាថ្មីម្តងទៀត បន្ទាប់ពីអាជ្ញាធរអាកាសចរណ៍សិង្ហបុរីបានដកបម្រាមហោះហើរ ដែលបានដាក់លើយន្តហោះម៉ូដែលនេះកាលពីជាង ២ ឆ្នាំមុន។ រំលឹកដែរថា យន្តហោះ Boeing 737 Max ត្រូវបានហាមឃាត់មិនឱ្យធ្វើអាជីវកម្មពាណិជ្ជកម្មនៅប្រទេសសិង្ហបុរី កាលពីខែមីនា ឆ្នាំ២០១៩ បន្ទាប់ពីគ្រោះថ្នាក់ធ្លាក់យន្តហោះ ២លើក នៅប្រទេសឥណ្ឌូនេស៊ី និងប្រទេសអេត្យូពីពាក់ព័ន្ធនឹងយន្តហោះនេះ។

អាជ្ញាធរអាកាសចរណ៍ស៊ីវិលសិង្ហបុរី (CAAS) នៅថ្ងៃច័ន្ទទី០៦ ខែកញ្ញា ឆ្នាំ២០២១នេះ បាននិយាយថា ខ្លួនបានដកការរឹតបន្តឹងលើយន្តហោះ Boeing 737 Max បន្ទាប់ពីបញ្ចប់ការវាយតម្លៃបច្ចេកទេសរបស់ខ្លួន។ ការសម្រេចនេះក៏ស្របទៅតាមអាជ្ញាធរអាកាសចរណ៍របស់សហរដ្ឋអាមេរិក និងសហភាពអឺរ៉ុប ដែលពួកគេបានសម្រេចដកការរឹតត្បឹតលើយន្តហោះនេះដូចគ្នា។ CAAS បាននិយាយថា ខ្លួនបានវាយតម្លៃលើការផ្លាស់ប្តូរការរចនា របស់យន្តហោះ Boeing ដែលត្រូវបានអនុម័តដោយរដ្ឋបាលអាកាសចរណ៍សហព័ន្ធអាមេរិក (FAA) និងអាជ្ញាធរមានសុពលភាពផ្សេងទៀត៕

អត្ថបទ៖ លីដា
ប្រភព៖ បាងកកប៉ុស្ដិ៍