យោងតាមការចុះផ្សាយរបស់សារព័ត៌មាន BBC បានរាយការណ៍ថា ប្រធានាធិបតីហ្វីលីពីនលោក រ៉ូឌ្រីហ្គោ ឌូតឺតេ បានប្រកាសថានឹងចូលនិវត្តន៍ពីឆាកនយោបាយ ហើយលោកក៏នឹងមិនឈរឈ្មោះក្នុងតំណែងណាមួយ នៅក្នុងការបោះឆ្នោតនៅឆ្នាំក្រោយនោះឡើយ។ គួររំលឹកផងដែរថា មេដឹកនាំវ័យ ៧៦ ឆ្នាំរូបនេះ កាលពីខែមុនបាននិយាយថា លោកនឹងឈរឈ្មោះជាអនុប្រធានាធិបតីនៅក្នុងការបោះឆ្នោតឆ្នាំ២០២២ ដោយសាររដ្ឋធម្មនុញ្ញរបស់ប្រទេសហ្វីលីពីន អនុញ្ញាតឱ្យប្រធានាធិបតីកាន់តំណែងតែ ១ អាណត្តិ ដែលមានរយៈពេល ៦ឆ្នាំ ប៉ុណ្ណោះ។ ប៉ុន្តែម្ដងនេះគាត់បាននិយាយថា គាត់នឹងដកខ្លួនចេញពីនយោបាយ ព្រោះថា គាត់មិនមានលក្ខណៈគ្រប់គ្រាន់សម្រាប់ប្រជាជនហ្វីលីពីទេ។

លោក រ៉ូឌ្រីហ្គោ ឌូតឺតេ ធ្លាប់ជាតួអង្គ «បុរសខ្លាំង» ដែលបានសន្យាថា លោកនឹងកាត់បន្ថយឧក្រិដ្ឋកម្ម និងដោះស្រាយបញ្ហាវិបត្តិគ្រឿងញៀន នៅពេលដែលលោកបានកាន់តំណែងកាលពីឆ្នាំ២០១៦។ ប៉ុន្តែក្រុមអ្នករិះគន់និយាយថា ក្នុងរយៈពេល ៥ឆ្នាំ ដែលលោកបានកាន់អំណាច លោក ឌូតឺតេ បានលើកទឹកចិត្តដល់ប៉ូលីស ក្នុងការសម្លាប់ជនសង្ស័យក្រៅប្រព័ន្ធតុលាការរាប់ពាន់នាក់ នៅក្នុងអ្វីដែលលោកហៅថា «សង្គ្រាមប្រឆាំងគ្រឿងញៀន»។

យោងតាមអង្គការសិទ្ធិមនុស្ស Amnesty International បានឱ្យដឹងថា មានមនុស្សជាង ៧,០០០ នាក់ ត្រូវបានសម្លាប់ដោយប៉ូលីស ឬជនប្រដាប់អាវុធ ក្នុងរយៈពេល ៦ ខែដំបូង នៃការកាន់តំណែងរបស់លោក ឌូតឺតេ។ កាលពីខែមិថុនា ព្រះរាជអាជ្ញារបស់ ICC បានបើកការស៊ើបអង្កេតពេញលេញមួយ ស្តីពីការសម្លាប់នៅក្នុងសង្រ្គាមគ្រឿងញៀនរបស់ហ្វីលីពីន ដោយដាក់ការសង្ស័យថា វាមានពាក់ព័ន្ធជាមួយឧក្រិដ្ឋកម្មប្រឆាំងមនុស្សជាតិ។ ជាមួយគ្នានេះដែរ កូនស្រីរបស់លោក រ៉ូឌ្រីហ្គោ ឌូតឺតេ គឺលោកស្រី Sara Duterte-Carpio ដែលជាចៅហ្វាយក្រុង Davao ក៏ត្រូវបានគេរំពឹងថា នឹងឈរឈ្មោះជាប្រធានាធិបតីនៅឆ្នាំក្រោយនេះដែរ ហើយលោកស្រីក៏ទំនងជានឹងការពារក្ដីឱ្យឪពុក ប្រសិនបើលោកស្រីជាប់ជាប្រធានាធិបតីថ្មីរបស់ប្រទេសហ្វីលីពីន៕

អត្ថបទ៖ លីដា
ប្រភព៖ BBC