រដ្ឋាភិបាល​ជប៉ុនបាន​និយាយ​ថា កូរ៉េ​ខាង​ជើង​បាន​បាញ់​មីស៊ីល​បាលីស្ទិកចំនួន ​២​ គ្រាប់ ​នៅ​ព្រឹក​ថ្ងៃ​ចន្ទនេះ។ រដ្ឋមន្ត្រីការពារជាតិជប៉ុន លោក Kishi Nobuo បាននិយាយថា កូរ៉េខាងជើងបានបាញ់មីស៊ីល ១ គ្រាប់ នៅម៉ោងប្រហែល ៨៖៤៩ នាទីព្រឹក ហើយគ្រាប់ទី២ នៅម៉ោងប្រហែល ៨៖៥២ ព្រឹក (ម៉ោងនៅប្រទេសជប៉ុន) ។ លោក Kishi បាននិយាយថា មីស៊ីលត្រូវបានបាញ់ក្នុងកម្ពស់អតិបរមាប្រហែល ៥០ គីឡូម៉ែត្រ ហើយទំនងជាហោះបានចម្ងាយប្រហែល ៣០០ គីឡូម៉ែត្រ តាមគន្លងផ្លោងជាធម្មតា។ លោកបាននិយាយថា មីស៊ីលទំនងជាបានចុះចតនៅជិតឆ្នេរសមុទ្រភាគខាងកើតរបស់ប្រទេសកូរ៉េខាងជើង នៅខាងក្រៅតំបន់សេដ្ឋកិច្ចផ្តាច់មុខរបស់ប្រទេសជប៉ុន។

លោក Kishi បាននិយាយថា៖«វាច្បាស់ណាស់ថាកូរ៉េខាងជើងកំពុងព្យាយាមកែលម្អបច្ចេកវិទ្យាមីស៊ីលរបស់ខ្លួន។ ការបាញ់មីស៊ីលផ្លោងស៊េរីថ្មីៗដោយកូរ៉េខាងជើង តំណាងឱ្យបញ្ហាប្រឈមដ៏ធ្ងន់ធ្ងរសម្រាប់សហគមន៍អន្តរជាតិទាំងមូល»។ ជាមួយគ្នានេះដែរ រដ្ឋាភិបាល​ជប៉ុនក៏​បាន​ដាក់​ពាក្យ​បណ្តឹង​ជា​ផ្លូវ​ការ​តាម​រយៈ​ស្ថានទូត​របស់​ខ្លួន​ក្នុង​ទីក្រុង​ប៉េកាំងផងដែរ។ អគ្គសេនាធិការចម្រុះរបស់កូរ៉េខាងត្បូងបាននិយាយផងដែរថា កូរ៉េខាងជើងបានបាញ់មីស៊ីលចំនួន ២ គ្រាប់ ដែលជឿថា ជាមីស៊ីលផ្លោងរយៈចម្ងាយខ្លី ឆ្ពោះទៅទិសខាងកើត ពីទីតាំងមួយនៅខាងក្រៅរដ្ឋធានីព្យុងយ៉ាង។ នេះ​ជា​លើក​ទី​៤​ ហើយ​ដែល​កូរ៉េ​ខាងជើង​បាញ់​មី​ស៊ី​ល​ចាប់តាំងពី​ចូលឆ្នាំ២០២២៕

អត្ថបទ៖ លីដា
ប្រភព៖ NHK