រដ្ឋាភិបាលចិនបាននិយាយថា ប្រជាជនចិនបានកើនឡើងដល់ ១.៤១ ពាន់លាននាក់ គិតត្រឹមចុងឆ្នាំមុន ដែលជាការកើនឡើង ៤៨០,០០០ នាក់ ធៀបនឹងឆ្នាំមុនៗមួយទៀត។ ការិយាល័យស្ថិតិជាតិបានប្រកាសកាលពីថ្ងៃចន្ទថា កំណើនប្រជាជនថ្មីមានការចុះថយក្នុងរយៈពេល ៦ឆ្នាំ ចុងក្រោយនេះ ដោយមានទារកតែ ១០.៦ លាននាក់ បានកើតកាលពីឆ្នាំមុន ដែលជាការធ្លាក់ចុះ ១.៤ លាននាក់ ធៀបនឹងតួលេខសម្រាប់ឆ្នាំ២០២០។ អត្រានៃកំណើនប្រជាជនសរុបគឺទាបបំផុតចាប់តាំងពីឆ្នាំ១៩៦០ នៅពេលដែលគោលនយោបាយ «មហាលោតផ្លោះ» ដ៏បរាជ័យ បាននាំឱ្យមានការស្លាប់មនុស្សមួយចំនួនធំដោយសារភាពអត់ឃ្លាន។

ចំនួនសរុបនៃអ្នកដែលមានអាយុចាប់ពី ៦៥ ឆ្នាំឡើងទៅ បានកើនឡើងជិត ១០ លាននាក់ បន្ថែមទៀត ដែលនាំឱ្យចំនួនមនុស្សវ័យចំណាស់កើនឡើងដល់ ២០០ លាននាក់ ឬស្មើនឹង ១៤% នៃចំនួនប្រជាជនសរុប។ រំលឹកដែរថា រដ្ឋាភិបាល​ចិន​បាន​លុបចោល​គោលនយោបាយ​កូន​មួយ ​ដែល​ជាច្បាប់មាន​អាយុកាល​រាប់​ទសវត្សរ៍​​ កាលពី​ឆ្នាំ២០១៦ ហើយ​ឥឡូវនេះ​ពួកគេអនុញ្ញាតឱ្យស្វាមីភរិយាអាចមានកូនរហូតដល់ ៣ នាក់បាន​។ ប៉ុន្តែ​អត្រា​កំណើត​បាន​បន្ត​ធ្លាក់​ចុះ​មួយ​ផ្នែក ​ដោយសារ​ការចំណាយថ្លៃចិញ្ចឹម​កូន​មាន​តម្លៃ​ខ្ពស់ពេក។ យ៉ាងណាក៏ដោយ ចំនួនប្រជាជនសរុបមិនថយចុះទេ ហើយប្រទេសនេះនឹងនៅតែរក្សាចំនួនប្រជាជនលើសពី ១.៤ ពាន់លាននាក់ដដែល៕

អត្ថបទ៖ លីដា
ប្រភព៖ SCMP