កាណាដាបានសម្ដែងការមិនពេញចិត្ត ចំពោះការអះអាងរបស់ចិនដែលថា ករណីអូមីក្រុងដំបូងរបស់ខ្លួន គឺឆ្លងពីសំបុត្រដែលផ្ញើចេញពីកាណាដា
- BY
- autoadmin
- January 18, 2022
រដ្ឋមន្ត្រីសុខាភិបាលនៃប្រទេសកាណាដា បានសម្តែងការមិនពេញចិត្តចំពោះការអះអាងរបស់ទីក្រុងប៉េកាំង ដែលថា ករណីជំងឺ COVID-19 ដំបូងគេរបស់ប្រទេសចិន អាចមានការផ្សារភ្ជាប់ទៅនឹងសំបុត្រ ដែលទទួលបានពីប្រទេសកាណាដា។ លោក Jean-Yves Duclos បានពណ៌នាការអះអាងនេះថាជា «ទស្សនៈខុសពីប្រក្រតី» នៅក្នុងសន្និសីទសារព័ត៌មានមួយកាលពីថ្ងៃចន្ទ។
ប្រព័ន្ធផ្សព្វផ្សាយកាណាដាបាននិយាយថាលោក Jean-Yves Duclos បានឆ្លើយតបថា ការអះអាងរបស់ទីក្រុងប៉េកាំងគឺ «មិនស្របតាមអ្វីដែលយើងបានធ្វើទាំងអន្តរជាតិ និងក្នុងស្រុក»។ លោកក៏បាននិយាយដែរថា លោកនឹងអនុញ្ញាតឱ្យអ្នកជំនាញសម្រេចថា តើការអះអាងបែបនេះទទួលយកបាន ឬអត់។ អាជ្ញាធរសុខាភិបាលកាណាដាក៏បានបញ្ជាក់ហើយថា ហានិភ័យជំងឺ COVID-19 នៅពេលប៉ះពាល់នឹងសំបុត្រ ឬកញ្ចប់បញ្ញើរ រួមទាំងសំបុត្រអន្តរជាតិ គឺមានកម្រិតទាបបំផុត៕
អត្ថបទ៖ លីដា
ប្រភព៖ NHK
- Share This Post: