តម្លៃប្រេងឆៅនៅសហរដ្ឋអាមេរិក បានឡើងថ្លៃដល់កម្រិតខ្ពស់បំផុតក្នុងរយៈពេល ៧ ឆ្នាំចុងក្រោយនេះ
- BY
- autoadmin
- January 19, 2022
តម្លៃប្រេងឆៅនៅសហរដ្ឋអាមេរិក បានហក់ឡើងដល់កម្រិតខ្ពស់បំផុតក្នុងរយៈពេលជាង ៧ឆ្នាំ ចុងក្រោយនេះ។ ដោយជាក់ស្ដែងតម្លៃប្រេងឆៅនៅលើ West Texas Intermediate នៅក្នុងការជួញដូររបស់ខ្លួនកាលពីថ្ងៃអង្គារបានបង្ហាញថា តម្លៃប្រេងឆៅបានកើនឡើងលើសពី ៨៦ ដុល្លារ ក្នុងមួយបារ៉ែល ហើយវាគឺជាតម្លៃខ្ពស់បំផុតចាប់តាំងពីឆ្នាំ២០១៤។ ជាមួយគ្នានេះដែរ អ្នកជំនាញរបស់ Goldman Sachs ក៏រំពឹងដែរថា តម្លៃប្រេងឆៅអាចនឹងឡើងថ្លៃរហូតដល់ ១០០ ដុល្លារ/បារ៉ែល ក្នុងឆ្នាំនេះ។
កត្តាដែលនាំឱ្យមានការកើនឡើងតម្លៃប្រេងឆៅ គឺអាចមកពីតម្រូវការពេលបើកសេដ្ឋកិច្ចឡើងវិញ និងភាពតានតឹងនៅមជ្ឈិមបូព៌ា ខណៈដែលអតិផរណា (លុយហើម) បាននាំឱ្យមានការកើនឡើងយ៉ាងខ្លាំងនៃតម្លៃប្រេងរួចស្រាប់ទៅហើយ។ កាលពីថ្ងៃចន្ទកន្លងទៅ ក្រុមឧទ្ទាមមកពីប្រទេសយេម៉ែន បានវាយប្រហារលើរថយន្តដឹកប្រេងនៅ Abu Dhabi របស់អារ៉ាប់រួម ដែលបាននាំឱ្យតម្លៃប្រេងមានការកើនឡើងចាប់ពីពេលនោះ។ គេបានរំពឹងថា ការរីករាលដាលនៃវ៉ារ្យ៉ង់ អូមីក្រុង នឹងធ្វើឱ្យតម្រូវការមានភាពធូរស្រាល ប៉ុន្តែវាទំនងជាមិនអាចបញ្ឈប់តម្លៃប្រេងនោះទេ៕
អត្ថបទ៖ លីដា
ប្រភព៖ NHK
- Share This Post: