ថ្មីៗនេះក្រុមហ៊ុន Sotheby’s បានដាក់បង្ហាញនូវពេជ្រពណ៌ខ្មៅដ៏កម្របំផុតរបស់ពិភពលោក ដែលមានទំហំ ៥៥៥.៥៥ ការ៉ាត់ ដែលគេស្គាល់ថាជា «The Enigma» នៅទីក្រុងឌូបៃ ប្រទេសអារ៉ាប់រួម នេះបើតាមការចុះផ្សាយរបស់សារព័ត៌មាន CNN ។ វាក៏អាចហៅបានម៉្យាងទៀតថា Carbonado ហើយអ្វីដែលគួរឱ្យចាប់អារម្មណ៍គឺថា ពេជ្រខ្មៅនេះត្រូវបានគេជឿថាមកពីភពក្រៅផ្សេងទៀត ដែលអាចបណ្ដាលមកពី​ឥទ្ធិពល​នៃអាចម៍ផ្កាយ ឬ​​ អាចម៍​ផ្កាយ​ដែល​មាន​ពេជ្រនៅក្នុងនោះបានធ្លាក់មកលើ​ផែនដី។ វាអាចមានអាយុកាលចន្លោះពី ២.៦ ទៅ ៣.៨ ពាន់លានឆ្នាំមុន ហើយមានបរិមាណ អាសូត និងអ៊ីដ្រូសែន តិចតួចនៅក្នុងនោះ ដែលសារធាតុទាំងនោះមាននៅតំបន់ផុតទំនាញ Interstellar Space។ វាក៏មានសារធាតុ Osbornite ដែលជាសារធាតុរ៉ែ មាននៅក្នុងអាចម៍​ផ្កាយ​។

ពេជ្រខ្មៅនោះត្រូវបានគេរំពឹងថា នឹងលក់ក្នុងតម្លៃ ៥ លានផោន (៦.៨ លានដុល្លារ) នៅពេលដែលវានឹងត្រូវដាក់ឱ្យដេញថ្លៃនៅថ្ងៃទី០៣ ដល់ទី០៩ ខែកុម្ភៈ នៅឯទីក្រុងឡុងដ៍ បន្ទាប់ពីការដាក់បង្ហាញនៅទីក្រុងឌូបៃ និងឡូសអេនជឺលេស ហើយក្រុមហ៊ុន Sotheby’s ក៏គ្រោងនឹងទទួលការទិញតាមរយៈរូបិយប័ណ្ណគ្រីបតូផងដែរ។ ការផ្លាស់ប្តូរនេះធ្វើឡើងបន្ទាប់ពីការលក់ត្បូងពេជ្រទំហំ ១០១ ការ៉ាត់ ឈ្មោះថា «The Key 10138» ធ្លាប់បានក្លាយជាគ្រឿងអលង្ការថ្លៃបំផុត ក្រោមការចំណាយដោយរូបិយប័ណ្ណគ្រីបតូ នៅពេលដែលវាត្រូវបានលក់កាលពីឆ្នាំមុន។ បើយោងតាមលោក Sophie Stevens អ្នកឯកទេសគ្រឿងអលង្ការនៅ Sotheby’s ក៏បានឱ្យដឹងដែរថា លេខ ៥ មានអត្ថន័យពិសេសសម្រាប់ពេជ្រខ្មៅនោះ ដោយសារវាមាន ៥៥ ជ្រុង៕

អត្ថបទ៖ លីដា
ប្រភព៖ CNN