ក្រុមហ៊ុន Neuralink ដែលជាក្រុមហ៊ុនបច្ចេកវិទ្យាសរសៃប្រសាទរបស់សហរដ្ឋអាមេរិក និងត្រូវបានសហការបង្កើតឡើងដោយមហាសេដ្ឋី Elon Musk កំពុងស្វែងរក​ប្រធាន​ផ្នែក​សាកល្បង​ព្យាបាល និង​អ្នក​សម្របសម្រួល​ការ​សាកល្បង​ព្យាបាល ដើម្បីមកចូលរួមជាមួយក្រុមហ៊ុននៅក្នុងគម្រោងថ្មីរបស់ខ្លួន។ ប្រការនេះគឺជាការបង្ហាញថា ក្រុមហ៊ុនទំនងជាឈានជិតដល់ការសាកល្បងថ្មីមួយ ដែលនឹងធ្វើការវះកាត់ដាក់បន្ទះឈីបចូលខួរក្បាលមនុស្ស ខណៈដែលក្រុមហ៊ុនផ្ទាល់ក៏កំពុងរង់ចាំការអនុម័តច្បាប់ពីរដ្ឋបាល​ចំណីអាហារ​ និង​ឪ​ស​ថអាមេរិក (FDA) នេះបើតាមការចុះផ្សាយរបស់សារព័ត៌មាន Russia Today ។

នៅក្នុងផ្សាយពាណិជ្ជកម្មស្វែងរកបុគ្គលិកសំខាន់ៗរបស់ខ្លួន ក្រុមហ៊ុនបាននិយាយថា៖«បុគ្គលិកនឹងត្រូវធ្វើការយ៉ាងជិតស្និទ្ធជាមួយវេជ្ជបណ្ឌិត និងវិស្វករដែលមានគំនិតច្នៃប្រតិដ្ឋបំផុតមួយចំនួន ក៏ដូចជាធ្វើការជាមួយអ្នកចូលរួមសាកល្បងព្យាបាលដំបូងរបស់ Neuralink»។ ក្រុមហ៊ុន Neuralink បាននិយាយថា ប្រធាន​ផ្នែក​សាកល្បង​ព្យាបាលនឹងត្រូវមកដឹកនាំ និងជួយបង្កើតក្រុមស្រាវជ្រាវ ហើយបង្កើតបាននូវការប្រាស្រ័យទាក់ទងគ្នា ដែលភ្ជាប់មកជាមួយបរិយាកាសដែលមានល្បឿនលឿន និងវិវឌ្ឍន៍ឥតឈប់ឈរ។ រំលឹកផងដែរថា កាលពីខែមុនលោក Elon Musk បាននិយាយថា លោករំពឹងថានឹងមានការវះកាត់ដាក់បន្ទះឈីបរបស់ Neuralink ចូលទៅក្នុងខួរក្បាលមនុស្ស នៅក្នុងពេលណាមួយនៅឆ្នាំ២០២២នេះ។

លោក Musk និងដៃគូ Neuralink របស់គាត់ បានបង្កើតក្រុមហ៊ុននេះក្នុងឆ្នាំ២០១៦ ដើម្បីអភិវឌ្ឍបន្ទះឈីបខួរក្បាលដែលភ្ជាប់មនុស្សជាមួយកុំព្យូទ័រ។ គាត់​បាន​អះអាង​ថា ​ការ​ផ្សាំ​គ្នានេះនឹង​អាច​ឱ្យ​មនុស្ស​ពិការ​អាច​គ្រប់គ្រង​ឧបករណ៍​ដូច​ជា ​ស្មា​ត​ហ្វូ​ន ​ជាមួយ​ខួរក្បាល​របស់​ពួក​គេបាន​។ គាត់រំពឹងថា នឹងមានការរីកចម្រើនបន្ថែមទៀត ដូចជាការដោះស្រាយពិការភាព ដោយការភ្ជាប់សញ្ញារវាងសិកាប្រសាទ នៅពេលដែលការសាកល្បងលើមនុស្សចាប់ផ្តើម។ ជាក់ស្ដែង Neuralink ក៏ធ្លាប់បានវះកាត់សាកល្បងដាក់បន្ទះឈីបរបស់ពួកគេ នៅក្នុងខួរក្បាលរបស់ស្វា macaque និងសត្វជ្រូករួចហើយ៕

អត្ថបទ៖ លីដា
ប្រភព៖ RT