អ្នកនេសាទជនជាតិឥណ្ឌូនេស៊ី ២នាក់ ត្រូវបានពិន័យជាប្រាក់ចំនួន ១០០,០០០ ដុល្លារតៃវ៉ាន់ (៣,៦១០ ដុល្លារអាមេរិក) ដោយអាជ្ញាធរសុខាភិបាលតៃវ៉ាន់ ដោយសារពួកគាត់បានចេញពីបន្ទប់សណ្ឋាគារ សម្រាប់ការដាក់ដាច់ដោយឡែកត្រឹមតែ ១ នាទីប៉ុណ្ណោះ។ អ្នកទាំង ២នាក់ ​បាន​មក​ដល់​កោះ​តៃវ៉ាន់​តាម​យន្តហោះ ​នៅ​ថ្ងៃ​ទី១៥ ខែ​វិច្ឆិកា ឆ្នាំ២០២០ ហើយ​ត្រូវបានបង្គាប់ឱ្យនៅដាច់ដោយឡែក ប៉ុន្តែនៅ​ល្ងាច​ថ្ងៃ​ទី​២២ វិច្ឆិកា ពួក​គេ​បាន​ចេញពី​បន្ទប់​ទៅ​ទិញ​ម្ហូប។ ពេល​ដើរ​ចូលកាត់​បន្ទប់​ទទួល​ភ្ញៀវ​របស់​សណ្ឋាគារ  បុគ្គលិក​ប្រាប់​ឱ្យ​ពួកគាត់ត្រឡប់​ទៅ​បន្ទប់​វិញ​ភ្លាម ហើយ​បុរស​ទាំង​នោះ​ក៏​ធ្វើ​តាម។

ប្រព័ន្ធផ្សព្វផ្សាយតៃវ៉ាន់បានរាយការណ៍ថា ទោះបីជាពួកគេចេញបានតែ ១នាទី ក៏ដោយ ពួកគេនៅតែទទួលការផាកពិន័យដោយអាជ្ញាធរ។ ប៉ុន្តែគិតមកទល់ពេលនេះពួកគេមិនទាន់បង់ប្រាក់បានគ្រប់ចំនួនទេ ហើយមន្ត្រីបានប្រកាសនៅថ្ងៃចន្ទ ទី២៤ ខែមករា ឆ្នាំ២០២២ នេះថា ពួកគេនៅជំពាក់ប្រាក់ពិន័យ ២៧០,០០០ ដុល្លារតៃវ៉ាន់ (៩,៧០០ ដុល្លារ) សម្រាប់ការផាកពិន័យ និងថ្លៃបន្ទប់។ យ៉ាងណាក៏ដោយ ទីបំផុតមេការរបស់ពួកគេបានបង់ប្រាក់ជំនួសបុរស ២ នាក់នោះ។

គួរឱ្យដឹងដែរថា កោះតៃវ៉ាន់មានច្បាប់ដាក់ឱ្យនៅដាច់ពីគេយ៉ាងតឹងរឹងបំផុតមួយចំនួននៅលើពិភពលោក ដោយនៅឆ្នាំ២០២០ ក៏ធ្លាប់មានពលករចំណាកស្រុកមកពីប្រទេសហ្វីលីពីន ត្រូវបានផាកពិន័យប្រហែល ៣,៥០០ ដុល្លារ សម្រាប់ការចាកចេញពីបន្ទប់ដាច់ដោយឡែកនៅ Kaohsiung ត្រឹមតែ ៨ វិនាទីប៉ុណ្ណោះ៕

អត្ថបទ៖ លីដា
ប្រភព៖ RT