ក្រុមហេកឃឺ Anonymous បានប្រកាសសង្គ្រាមអ៉ីនធឺណេត ប្រឆាំងនឹងរដ្ឋាភិបាលរបស់លោក វ្ល៉ាឌីមៀ ពូទីន
ក្រុមហេកឃឺ Anonymous បានបិទគេហទំព័ររដ្ឋាភិបាលរុស្ស៊ីជាច្រើន រួមទាំងសេវាព័ត៌មាន «Russia Today» ដែលគ្រប់គ្រងដោយរដ្ឋ។ ក្រុមហេកឃឺដែលកំណត់អត្តសញ្ញាណជា Anonymous បានប្រកាសថា ពួកគេបានបើកប្រតិបត្តិការអ៉ីនធឺណេត វាយប្រហារលើ RT.com បានមួយរយៈខ្លី ក៏ដូចជាគេហទំព័ររបស់វិមានក្រឹមឡាំង រដ្ឋាភិបាលរុស្ស៊ី និងគេហទំព័រក្រសួងការពារជាតិរុស្ស៊ី។ វេបសាយព័ត៌មាន RT.com បានបញ្ជាក់ថា ការវាយប្រហារនេះបានធ្វើឱ្យគេហទំព័រមួយចំនួនមានល្បឿនយឺត ខណៈពេលដែលគេហទំព័រផ្សេងទៀតត្រូវ offline ។ ការវាយប្រហាររបស់ក្រុម Anonymous គឺជាប្រភេទ DDoS ដែលវាអាចបង្អាក់ចរាចររបស់វេបសាយទាំងនោះ។
ការប្រកាសសង្គ្រាមតាមអ៉ីនធឺណេតរបស់ Anonymous បង្កើនការរំពឹងទុកថា រុស្ស៊ីអាចនឹងត្រូវទទួលរងនូវការប៉ុនប៉ងលួចចូលជាប្រព័ន្ធ ក្នុងរយៈពេលប៉ុន្មានថ្ងៃខាងមុខនេះ។ មុនពេលការលុកលុយលើអ៊ុយក្រែននៅថ្ងៃព្រហស្បតិ៍ រដ្ឋាភិបាល និងធនាគាររបស់ប្រទេសអ៊ុយក្រែន ត្រូវបានគេកំណត់គោលដៅដោយការវាយប្រហារតាមអ៉ីនធឺណេតដ៏ធំ ដែលត្រូវបានគេជឿថា ធ្វើឡើងដោយរុស្ស៊ី។ គួរឱ្យដឹងដែរថា ក្រុមហេកឃឺ Anonymous គឺជាសមូហភាពវិមជ្ឈការ ដោយគ្មានឋានានុក្រម ឬភាពជាអ្នកដឹកនាំ ហើយត្រូវបានគេដឹងថា បានដោះស្រាយបញ្ហាជាច្រើន ដោយការវាយប្រហារពីមុនៗ សំដៅលើ CIA រដ្ឋអ៊ីស្លាម និងសាសនាចក្រនៃវិទ្យាសាស្ត្រ (Church of Scientology)៕
អត្ថបទ៖ លីដា
ប្រភព៖ Daily Mail