ពលរដ្ឋជាង ៧៥០នាក់ ត្រូវបានចាប់ខ្លួននៅក្នុងទីក្រុងជាច្រើនទូទាំងប្រទេសរុស្ស៊ី ចំពោះការតវ៉ាប្រឆាំងនឹងការលុកលុយរបស់ទីក្រុងមូស្គូ ទៅលើប្រទេសអ៊ុយក្រែន ខណៈការឈ្លានពានរបស់ខ្លួនបានឈានចូលសប្ដាហ៍ទី៣ នេះបើតាមការចុះផ្សាយរបស់សារព័ត៌មាន NHK ។ ក្រុមឃ្លាំមើលឯករាជ្យ OVD-Info បាននិយាយថា ប៉ូលីសបានចាប់ខ្លួនពលរដ្ឋយ៉ាងហោចណាស់ចំនួន ៧៥៦ នាក់ ក្នុងអំឡុងពេលធ្វើបាតុកម្មនៅក្នុងទីក្រុងចំនួន ៣៧ ទូទាំងប្រទេសរុស្ស៊ី ហើយពាក់កណ្តាលនៃពួកគេគឺនៅក្នុងរដ្ឋធានីម៉ូស្គូ។ ក្រុមឃ្លាំមើលបានរាយការណ៍ថា ចាប់តាំងពីលោកប្រធានាធិបតី វ្ល៉ាឌីមៀ ពូទីន បានបញ្ជាឱ្យមានការឈ្លានពានទាំងផ្លូវទឹក ដី និងអាកាស របស់ប្រទេសអ៊ុយក្រែន នៅថ្ងៃទី២៤ ខែកុម្ភៈ មានមនុស្សរហូតដល់ទៅជាង ១៤,០០០ នាក់ ត្រូវបានចាប់ខ្លួនពាក់ព័ន្ធនឹងសកម្មភាពប្រឆាំងសង្គ្រាម ហើយក្នុង​នោះ​មាន​មនុស្ស​ជាង ១៧០​នាក់​ ត្រូវ​បាន​ឃុំ​ខ្លួន​ក្នុង​មន្ទីរ​ឃុំឃាំង។

គួរឱ្យដឹងដែរថា វិមានក្រឹមឡាំងបានអនុម័តច្បាប់ថ្មីមួយ ដែលបានចូលជាធរមានកាលពីថ្ងៃទី០៤ ខែមីនា ឆ្នាំ២០២២ ដែលនឹងផ្ដល់ទោសឧក្រិដ្ឋ ចំពោះការរាយការណ៍អំពីសង្គ្រាមឯករាជ្យ និងការតវ៉ាប្រឆាំងនឹងសង្រ្គាម ដោយមានការផ្តន្ទាទោសដាក់ពន្ធនាគាររហូតដល់ ១៥ឆ្នាំ។ ដូច្នេះវា​ពិបាក​ណាស់​សម្រាប់​មនុស្ស​ដែលធ្វើការ​តវ៉ានៅតាមដងផ្លូវ ខណៈកាលពីចុងសប្តាហ៍មុន ប៉ូលីសក៏បានចាប់ខ្លួនបាតុករជាង ៥,០០០ នាក់ នៅទូទាំងប្រទេសរុស្ស៊ីផងដែរ។ ប៉ូលីសបង្រ្កាបកុបកម្មមួយចំនួន បានពាក់មួយសុវត្ថិភាពមានអក្សរ «Z» ដែលដូចគ្នាទៅនឹងអ្វីដែល​គេ​ឃើញ​នៅ​លើ​រថក្រោះ​រុស្ស៊ី​ ដែលបញ្ជូនទៅប្រទេស​អ៊ុយក្រែន ហើយវាមានន័យថាជា «ប្រតិបត្តិការពិសេស» របស់ប្រទេសរុស្ស៊ី៕

អត្ថបទ៖ លីដា
ប្រភព៖ NHK