ធ្លាក់ទៀតហើយ! យន្តហោះចម្បាំងតម្លៃរាប់លានដុល្លាររបស់អាមេរិកមួយគ្រឿងធ្លាក់ចូលសមុទ្រតែសំណាងល្អជួយសង្គ្រោះទាន់ពេល
អាមេរិក៖ យន្តហោះចម្បាំងអាមេរិកមួយគ្រឿងមកពីក្រុម USS Ronald Reagan បានធ្លាក់ចូលក្នុងសមុទ្រភាគឦសាននៃប្រទេសហ្វីលីពីនកាលពីថ្ងៃចន្ទ ប៉ុន្តែអ្នកបើកបរយន្តហោះពីរនាក់របស់ពួកគេត្រូវបានជួយសង្គ្រោះដោយសុវត្ថិភាព។ កងនាវាចរអាម៉េរិកបាននិយាយថាយន្តហោះ F / A-18 Hornet មានបញ្ហាមេកានិកនៅក្នុងប្រតិបត្តិការនៅក្នុងសមុទ្រហ្វីលីពីន។ យ៉ាងណាមិញយន្តហោះសង្គ្រោះបានសង្គ្រោះអ្នកបើកយន្តហោះចេញពីក្នុងទឹក ហើយបាននាំពួកគេឡើងគោកវិញភ្លាមៗ។
មូលហេតុនៃការធ្លាក់យន្តហោះនេះកំពុងស្ថិតនៅក្រោមការស៊ើបអង្កេត។ ការធ្លាក់នេះគឺជាការធ្លាក់យន្តហោះទីពីររបស់ USS Ronald Reagan ក្នុងខែនេះ។ កាលពីពាក់កណ្តាលខែតុលាយន្តហោះ MH-60 Seahawk ក៏បានធ្លាក់ភ្លាមៗបន្ទាប់ពីការហោះហើរដែរ។ យន្តហោះចម្បាំងអាមេរិកនេះបានចូលរួមក្នុងសមយុទ្ធរួមមួយដែលមានឈ្មោះថា “Keen Sword” ជាមួយប្រទេសជប៉ុន និងប្រទេសកាណាដាចាប់តាំងពីថ្ងៃទី២៩ តុលាដល់ថ្ងៃទី០៨ ខែវិច្ឆិកានៅក្នុងដែនទឹកជុំវិញប្រទេសជប៉ុននិងនៅជិតកោះហ្គាមនៅប៉ាស៊ីហ្វិក៕
អត្ថបទ៖ លីដា
ប្រភព៖ washingtonpost