រដ្ឋអាជ្ញាកំពូលរបស់ប្រទេសអ៊ុយក្រែន គឺលោកស្រី Iryna Venedyktova បាននិយាយថា មានសាកសពចំនួន ៤១០ ត្រូវបានរកឃើញនៅក្នុងទីក្រុងនានា ដែលកងកម្លាំងរុស្ស៊ីចូលវាយលុកនៅជិតរដ្ឋធានី Kyiv ហើយការរកឃើញនេះដែរ គឺជាផ្នែកមួយនៃការស៊ើបអង្កេតលើឧក្រិដ្ឋកម្មសង្រ្គាម នេះបើយោងតាមការចុះផ្សាយរបស់សារព័ត៌មាន CNBC ។ អភិបាលក្រុង Bucha ដែលជាទីប្រជុំជនចម្ងាយ ២៣ ម៉ាយ ពីភាគពាយព្យនៃទីក្រុង Kyiv បានប្រាប់ថា មានអ្នកស្រុកចំនួន ៣០០ នាក់ ត្រូវបានគេសម្លាប់នៅក្នុងទីក្រុងរបស់គាត់ ខណៈដែលកងកម្លាំងមកពីតំបន់ Chechnya ដែលគ្រប់គ្រងដោយរុស្ស៊ី ក៏បានគ្រប់គ្រងទីតាំងនេះ។

លោកស្រី Venedyktova បាននិយាយថា ព្រះរាជអាជ្ញាអ៊ុយក្រែនអាចចូលទៅទីក្រុង Bucha, Irpin និង Hostomel ជាលើកដំបូងកាលពីថ្ងៃអាទិត្យ ហើយពួកគេត្រូវការពេលវេលាបន្ថែមទៀត ដើម្បីវាយតម្លៃពីទំហំនៃឧក្រិដ្ឋកម្មនោះ។ លោកស្រីបានបន្ថែមថា៖«យើងត្រូវធ្វើការជាមួយសាក្សី។ ប៉ុន្តែឥឡូវនេះ ពលរដ្ឋ​មាន​ការ​តានតឹង​ខ្លាំងណាស់ ដែលធ្វើឱ្យពួកគេ​មិន​អាច​និយាយ​អ្វីបាន»។ យ៉ាងណាក៏ដោយ ភាគីរុស្ស៊ីបានបដិសេធលើការចោទប្រកាន់នេះ។

ជាមួយគ្នានេះដែរ ប្រធានាធិបតីអ៊ុយក្រែនលោក Volodymyr Zelenskyy បានចោទប្រកាន់រុស្ស៊ីពីបទប្រល័យពូជសាសន៍ ប្រឆាំងនឹងប្រជាជនអ៊ុយក្រែន ដោយលោកបាននិយាយនៅក្នុងបទសម្ភាសន៍មួយថា៖«ប្រទេសយើងមានច្រើនជាង ១០០ សញ្ជាតិរស់នៅ។ នេះ​ជា​ការ​បំផ្លិចបំផ្លាញ និង​បំផ្លាញ​ជាតិ​សាសន៍​ទាំង​នោះ»។ លោក Zelenskyy បានធ្វើអត្ថាធិប្បាយបែបនេះ បន្ទាប់ពីមានការព្រមានថា កងកម្លាំងរុស្ស៊ីចង់ដណ្តើមយកភាគខាងកើត និងភាគខាងត្បូងរបស់អ៊ុយក្រែន។ លោក​ក៏​បាន​និយាយ​ដែរ​ថា កងកម្លាំង​អ៊ុយក្រែន​ពេលនេះ បាន​គ្រប់គ្រង​សហគមន៍​ក្នុង​ទីក្រុង Kyiv និង Chernihiv ឡើងវិញ ហើយលោកក៏​បាន​អំពាវនាវ​ឱ្យមាន​បទ​ឈប់​បាញ់​មួយ​ មុន​ពេល​ជួប​ទទល់ជាមួយ​ប្រធានាធិបតី​រុស្ស៊ីលោក Vladimir Putin ៕

អត្ថបទ៖ លីដា
ប្រភព៖ CNBC