អត្តពលិកអ៊ុយក្រែនមួយចំនួនកំពុងដាក់លក់មេដាយ ដែលពួកគេបានឈ្នះនៅក្នុងព្រឹត្តិការណ៍កីឡាអូឡាំពិក និងប៉ារ៉ាឡាំពិកទីក្រុងតូក្យូឆ្នាំ២០២០ ដើម្បីរៃអង្គាសថវិកាជួយប្រទេសជាតិ នៅពេលដែលសង្គ្រាមរុស្ស៊ី-អ៊ុយក្រែន នៅតែអូសបន្លាយកាន់តែយូរទៅៗ។ ជាក់ស្ដែងកីឡាករ​ប៉ារ៉ាឡាំពិកផ្នែកប្រណាំងទូក គឺលោក Serhii Yemelianov បានប្រកាសអំពីការដេញថ្លៃ ​ចំពោះមេដាយ​មាស​ដែលគាត់បានឈ្នះពី​វិញ្ញាសាប្រណាំងទូក​កាយ៉ាក​ចម្ងាយ ២០០ ​ម៉ែត្រ នៅលើបណ្ដាញសង្គមរបស់គាត់។ គាត់បាននិយាយថា គាត់កំពុងលក់មេដាយរបស់គាត់ដើម្បីគាំទ្រ «អ្នកការពារអ៊ុយក្រែន»។ គាត់បន្ថែមថា «រួមគ្នាយើងនឹងឈ្នះ» និង «ចូរសិរីល្អមានដល់អ៊ុយក្រែន»។

ចំណែកឯអត្តពលិកការ៉ាតេអ៊ុយក្រែនម្នាក់ទៀត គឺលោក Stanislav Horuna ដែលបានឈ្នះមេដាយសំរឹទ្ធ លើវិញ្ញាសា Kumite ក្នុងប្រភេទទម្ងន់ក្រោម ៧៥ គីឡូក្រាម នៅក្នុងព្រឹត្តិការណ៍អូឡាំពិកទីក្រុងតូក្យូឆ្នាំ២០២០ ក៏កំពុងប្រកាសលក់មេដាយរបស់គាត់ នៅលើគេហទំព័រដេញថ្លៃតាមអ៉ីនធឺណិតមួយផងដែរ។ នៅក្នុងវីដេអូដែលបានបង្ហោះនៅលើគេហទំព័រដាក់ដេញថ្លៃមួយនោះ គាត់បាននិយាយថា មេដាយអូឡាំពិករបស់គាត់មានតម្លៃបំផុតក្នុងចំណោមមេដាយជាង ២០០ ដែលគាត់ធ្លាប់បានឈ្នះក្នុងអាជីព ១៩ឆ្នាំ របស់គាត់។ គាត់​បាន​និយាយ​ថា៖«ខ្ញុំ​ចង់​លក់​វា​នៅ​ក្នុង​ការ​ដេញ​ថ្លៃ ​ដើម្បី​ជួយ​ប្រជាជន​របស់​ខ្ញុំ​នៅ​ពេល​លំបាក​នេះ»៕

អត្ថបទ៖ លីដា
ប្រភព៖ Teller Report