យោងតាមការចុះផ្សាយរបស់សារព័ត៌មាន BBC បានរាយការណ៍ថា មនុស្សយ៉ាងតិច ២៥ នាក់បានស្លាប់ នៅក្នុងគ្រោះបាក់ដី និងទឹកជំនន់ នៅក្នុងប្រទេសហ្វីលីពីន បន្ទាប់ពីព្យុះត្រូពិច Megi បានបោកបក់ប្រទេសនេះ។ រហូតមកដល់ថ្ងៃអង្គារនេះ ក្រុម​ជួយ​សង្គ្រោះ​នៅ​តែបន្ដ​ប្រយុទ្ធ​ ដើម្បី​ទាញ​យក​មនុស្ស​ដែល​ជាប់​គាំង​នៅ​ឆ្នេរ​ភាគ​ខាង​កើត និង​ខាង​ត្បូង។ ជម្រាបដែរថា ព្យុះត្រូពិច Megi បានវាយប្រហារហ្វីលីពីនកាលពីថ្ងៃអាទិត្យ ជាមួយល្បឿនរហូតដល់ ៦៥ គីឡូម៉ែត្រ ក្នុងមួយម៉ោង។ វា​ជា​ព្យុះ​ទីមួយ​ក្នុង​ឆ្នាំ​នេះសម្រាប់ហ្វីលីពីន ​ខណៈដែលជា​ធម្មតាប្រទេសនេះ​មាន​ខ្យល់​ព្យុះ​ជា​មធ្យម​ចំនួន ២០ ក្នុង​មួយ​ឆ្នាំ។

ជាមួយគ្នានេះដែរ មានមនុស្សជាង ១៣,០០០ នាក់ បានភៀសខ្លួនទៅកាន់ទីជម្រកខ្ពស់ៗ ខណៈដែលខ្យល់ព្យុះបានបោកបក់លើឆ្នេរសមុទ្រភាគខាងកើត ធ្វើឱ្យមានភ្លៀង​ធ្លាក់​ខ្លាំង និង​ខ្យល់​កន្ត្រាក់ ដែល​បាន​ផ្តាច់​ការផ្គត់ផ្គង់​អគ្គិសនី ជន់​លិច​ផ្ទះ និង​ស្រែចម្ការ និង​បង្ក​ឱ្យ​មានការ​បាក់​ដី​នៅតាម​ភូមិ​។ អាជ្ញាធរក្នុងតំបន់ក្នុងទីក្រុង Baybay បាននិយាយកាលពីថ្ងៃចន្ទថា តំបន់មួយក្នុងចំណោមតំបន់ដែលរងផលប៉ះពាល់ខ្លាំងជាងគេ គឺខេត្ត Leyte ជាកន្លែងដែលមានសាកសពចំនួន ២២ ត្រូវបានគេកាយចេញមកបាន បន្ទាប់ពីត្រូវបានកប់នៅក្រោមដី។ សាកសពចំនួន ៣ ផ្សេងទៀត ត្រូវបានរកឃើញនៅតំបន់ Davao ភាគខាងត្បូង នេះបើតាមការទីភ្នាក់ងារគ្រោះមហន្តរាយជាតិ៕

អត្ថបទ៖ លីដា
ប្រភព៖ BBC