ថៃ៖ យោងតាមប្រភពព័ត៌មានបានអោយដឹងថា លោកតាវ័យ៧០ឆ្នាំ មានឈ្មោះថា Nanthawat roengkitipiboon មកពីស្រុក សាន់ខាក់បុរី មានអាជីពជាជាងធ្វើកាំបិតតាំងពីអាយុ២០ ឆ្នាំមកម្ល៉េះ។ អាជីពនេះគាត់បានបន្តមកតាំងពីជំនាន់ដូនតាមក ហើយលោកតា Nanthawat បានប្រកបអាជីពជាជាងធ្វើកាំបិតដោយអាចរកចំណូលបានពីចន្លោះ ៤០០បាត (ជាង១២ដុល្លារ) រហូតដល់ ២,៥០០បាត (ជាង ៨០ដុល្លារ) ក្នុងមួយដើម ថែមទាំងអាចបញ្ជូនកូនរៀនចប់បរិញ្ញាបត្របានគ្រប់គ្នា។

ក្នុងវ័យដែលដែកាន់តែជរាលោកតាបានពោលទាំងស្តាយថា៖ «កូនៗគេនាំគ្នាទៅធ្វើការងារផ្ទាល់ខ្លួនអស់ ស្តាយណាស់គ្មានអ្នកបន្តអាជីពដែលមានតាំងពីជំនាន់ដូនតា »។ ជាមួយគ្នានេះ លោកតាថែមទាំងបន្តទៀតថា៖ «តាមការពិតអាជីពមួយនេះអាចរកចំណូលបានរយៈពេលយូរ ប៉ុន្តែក្មេងៗសម័យនេះមិនមានភាពអត់ធ្មត់ទេ ប្រសិនបើមានភាពអត់ធ្មត់ និងទឹកដៃល្អជាងនេះបន្តិចទៀត អាចបើកហាងផលិតកាំបិតលក់បានតែម្តង ដោយមិនចាំបាច់ទៅធ្វើជាបុគ្គលិកសុីប្រាក់ខែគេឡើយ»។ មិនតែប៉ុណ្ណោះ អាជីពនេះថែមទាំងអាចហ្វឹកហាត់អោយមនុស្សមានចិត្តត្រជាក់ ចេះអត់ធ្មត់ ព្រោះទាំងនឿយហត់ ទាំងក្តៅ ប៉ុន្តែបើយើងចេះអត់ធ្មត់ ធ្វើដោយចិត្តត្រជាក់នោះលទ្ធផលនៃការផលិតកាំបិតចេញមកពិតជាទទួលបានទាំងភាពស្រស់ស្អាតនិងមានគុណភាពល្អទៀតផង៕

អត្ថបទ៖ Bee
ប្រភព៖ khaosod