ប្រធានាធិបតី​រុស្ស៊ី​បាន​ព្រមាន​មេដឹកនាំ​បរទេស​ម្តង​ហើយ​ម្តងទៀត ​ពី​ការ​លូកដៃ​ចូលទៅ​ក្នុងបញ្ហានៅអ៊ុយក្រែន។ ឥឡូវនេះ លោក វ្ល៉ាឌីមៀ ពូទីន បានចេញការគំរាមកំហែងខ្លាំងជាងមុន ដោយបាននិយាយថា ប្រទេស​ណា​ដែល​ធ្វើ​អន្តរាគមន៍​នៅអ៊ុយក្រែន នឹង​ត្រូវ​ជួប​ជា​មួយ​នឹង​ការ​ឆ្លើយ​តប​ខាង​យោធា «លឿន​ដូច​រន្ទះ»។ លោក ពូទីន បានប្រាប់សមាជិកសភារុស្ស៊ីកាលពីថ្ងៃពុធថា ការសម្រេចចិត្តទាំងអស់អំពីព័ត៌មានលម្អិតនៃការសងសឹក ត្រូវបានធ្វើឡើងរួចហើយ។ គាត់​បាន​និយាយ​ថា ពួកគេ​មាន​ឧបករណ៍​ទាំងអស់​សម្រាប់​សង្គ្រាម អ្វីៗ​ដែល​អ្នក​ដទៃ​មិន​អាច​អួត​បាន លោក​ថា​គេ​មិន​អួត​ទេ ហើយ​ថា​នឹង​ប្រើ​បើ​ចាំបាច់។

លោក ពូទីន បានបន្ថែមថា ទណ្ឌកម្មដែលដាក់ដោយលោកខាងលិច មិនបានធ្វើឱ្យខូចសេដ្ឋកិច្ចប្រទេសរុស្ស៊ីនោះទេ។ គាត់ក៏បានសន្យាថា គោលដៅយោធានៃការលុកលុយនឹងទទួលបានជោគជ័យ «ដោយគ្មានលក្ខខណ្ឌ»។ ជម្រាបជូនដែរថា កងកម្លាំងរុស្ស៊ីបន្តវាយលុកគោលដៅនៅភាគខាងកើត និងភាគខាងត្បូងអ៊ុយក្រែន ខណៈមន្ត្រីការពារជាតិបាននិយាយថា ពួកគេបានបំផ្លាញប៉ុស្តិ៍បញ្ជាការអ៊ុយក្រែន ប្រព័ន្ធប្រឆាំងយន្តហោះ និងឧបករណ៍ផ្សេងទៀត។ រុស្ស៊ីក៏និយាយផងដែរថា កងកម្លាំងរបស់ពួកគេបានកាន់កាប់តំបន់ Kherson ទាំងមូលនៅភាគខាងត្បូង។ ចំណែកវិមានក្រឹមឡាំងបាននិយាយថា សកម្មភាពរបស់ប្រទេសរុស្ស៊ី បានជះឥទ្ធិពលដោយសារប្រទេស «អមិត្ត» លោកខាងលិច៕

អត្ថបទ៖ លីដា
ប្រភព៖ BBC