កូរ៉េខាងត្បូង​បាន​ដក​ច្បាប់ពាក់​ម៉ាស់​នៅពេលចេញក្រៅទាំងអស់ ស្របពេល​ករណីជំងឺ COVID-19 ​ថ្មី​ៗ បាន​ការធ្លាក់ចុះគួរឱ្យកត់សម្គាល់។ ចាប់ពីថ្ងៃច័ន្ទម្សិលមិញនេះ ពលរដ្ឋនឹងមិនចាំបាច់ពាក់ម៉ាស់មុខពេលចេញក្រៅទៀតទេ លើកលែងតែក្នុងស្ថានភាព ដូចជាការជួបជុំមនុស្ស ៥០នាក់ ឬច្រើនជាងនេះ។ ប្រទេសនេះបានរាយការណ៍អំពីករណីថ្មីជាង ២០,០០០ កាលពីថ្ងៃអាទិត្យ ដែលជាចំនួនប្រចាំថ្ងៃក្រោម ៣០,០០០ ករណី ជាលើកដំបូងចាប់តាំងពីដើមខែកុម្ភៈ។ ចំនួន​នេះ​បាន​នឹង​កំពុង​ធ្លាក់​ចុះ​ពី​កម្រិត​ខ្ពស់​បំផុត​នៅ​ពាក់​កណ្តាល​ខែ​មីនា នៅ​ពេល​ដែល​វា​បានហក់​ឡើង​ដល់ ៦០០,០០០ ករណី។

នៅឧទ្យានមួយក្នុងរដ្ឋធានីសេអ៊ូលកាលពីថ្ងៃចន្ទ មនុស្សដែលមិនពាក់ម៉ាស់មុខត្រូវបានគេឃើញជជែកជាមួយមិត្តភ័ក្តិ និងដើរលេងលំហែកាយ ជាមួយនឹងសីតុណ្ហភាពពេលថ្ងៃកើនឡើងដល់ជិត ២០ អង្សាសេ។ សិស្សវិទ្យាល័យម្នាក់ដែលមិនបានពាក់ម៉ាស់មុខបាននិយាយថា នាងខ្លាចបន្តិចដែរ ប៉ុន្តែវាពិតជាមានអារម្មណ៍ល្អណាស់ក្នុងការស្រូបខ្យល់អាកាសបរិសុទ្ធជាលើកដំបូង ក្នុងរយៈពេលជាង ១ ឆ្នាំកន្លងមក ដោយសារការដាក់កំហិតបានធ្វើឡើងតាំងពីខែតុលា ឆ្នាំ២០២០។ យ៉ាងណាក៏ដោយ មានមនុស្សជាច្រើននៅតែពាក់ម៉ាសនៅខាងក្រៅ ព្រោះពួកគេនៅតែភ័យខ្លាចជំងឺ COVID-19 ឬអាចនិយាយថា ការពាក់ម៉ាស់បានក្លាយជាផ្នែកមួយនៃទម្លាប់របស់ពួកគេ៕

អត្ថបទ៖ លីដា
ប្រភព៖ រ៉យទ័រ