ប្រទេសរុស្ស៊ីបាននិយាយថា ខ្លួនបានហាមប្រាមពលរដ្ឋជប៉ុនចំនួន ៦៣នាក់ រួមទាំងនាយករដ្ឋមន្ត្រីលោក Kishida Fumio មិនឱ្យចូលប្រទេសខ្លួនឡើយ។ ប្រការនេះបាន​កើត​ឡើង​ក្នុង​ការ​សងសឹក​ចំពោះ​ការ​ដាក់​ទណ្ឌកម្ម​របស់​ជប៉ុន​ប្រឆាំង​នឹង​ក្រុង​ម៉ូស្គូ​ ដោយសារការ​ឈ្លានពានរបស់រុស្ស៊ីលើ​អ៊ុយក្រែន។ ក្រសួងការបរទេសរុស្ស៊ីបានធ្វើសេចក្តីប្រកាសនេះ នៅក្នុងសេចក្តីថ្លែងការណ៍មួយកាលពីថ្ងៃពុធ ហើយបុគ្គល​ដែល​ត្រូវ​បាន​គេ​កំណត់​គោលដៅ ​ក៏​រួម​មាន​រដ្ឋមន្ត្រី​ការ​បរទេស​លោក Hayashi Yoshimasa, សមាជិក​រដ្ឋាភិបាល និង​សមាជិកសភា, សាស្ត្រាចារ្យ​សាកលវិទ្យាល័យ និង​អ្នក​កាសែត។

សេចក្តីថ្លែងការណ៍និយាយថា ទីក្រុងតូក្យូបានចាប់ផ្តើមយុទ្ធនាការប្រឆាំងរុស្ស៊ីដែលមិនធ្លាប់មានពីមុនមក ដោយចាត់វិធានការដើម្បីធ្វើឱ្យខូចសេដ្ឋកិច្ចរបស់ប្រទេសរុស្ស៊ី និងអាជ្ញាធរអន្តរជាតិ។ សេចក្តីថ្លែងការណ៍បាននិយាយថា ប្រទេសរុស្ស៊ីបានសម្រេចចិត្តដាក់ការហាមឃាត់ការចូលនេះ បន្ទាប់ពីគិតគូរពីការដាក់ទណ្ឌកម្មរបស់ប្រទេសជប៉ុន ប្រឆាំងនឹងពលរដ្ឋរុស្ស៊ី រួមទាំងថ្នាក់ដឹកនាំកំពូលរបស់ផងដែរ។ រុស្សីក៏បានហាមប្រាមការចូលរបស់មន្ត្រីរដ្ឋាភិបាលអាមេរិក និងអង់គ្លេស រួមទាំងប្រធានាធិបតី Joe Biden និងនាយករដ្ឋមន្ត្រី Boris Johnson ផងដែរ៕

អត្ថបទ៖ លីដា
ប្រភព៖ NHK