ឥណ្ឌា៖ យោងតាមប្រភពព័ត៌មាន Khaosod បានចុះផ្សាយពីករណីដ៏គួរឱ្យចាប់អារម្មណ៍មួយនាពេលថ្មីៗ​នេះ ដោយបុរស​ម្នាក់​បានដឹកដៃកូនក្រមុំដល់ទៅ ៣នាក់ចូលរោងការ ដោយមានកូនៗរបស់ពួកគេក៏ដូចជាភ្ញៀវជាច្រើនចូលរួមជាសាក្សី។

តាម​សារព័ត៌មានដដែលបាន​ឲ្យ​ដឹង​ថា ពិធី​មង្គលការ​បាន​ប្រព្រឹត្ត​ទៅ​កាលពី​ថ្ងៃ​ទី​៣០ ខែមេសានៅរដ្ឋ Madhya Pradesh ប្រទេសឥណ្ឌា។ កូនកំលោះមានឈ្មោះ សំ រ៉ាត់ ម៉ូរីយ៉ា អាយុ៤២ឆ្នាំ ចំណែកកូនក្រមុំ​ទាំង​បី​មាន​ឈ្មោះ​ថា ណា​ប៊ី ,មី​ឡា និង​សា​គ្រី ដែល​មាន​អាយុ​ចន្លោះ​ពី​៣០​ដល់​៣៥​ឆ្នាំ ។ មុនពេលឈានដល់ការរៀបការគឺលោក សំរ៉ាត់ ជាអ្នកបបួលអោយភរិយាទាំង៣រត់តាមគ្នាមក ដោយពួក​គេ​បាន​រៀប​ការ​ជាង​១៥​ឆ្នាំ​មក​ហើយ ហើយ​មាន​កូន​៦​នាក់​ជាមួយ​គ្នា ក្នុងនោះ មាន​ប្រុស ៣​នាក់​ស្រី​៣​នាក់ មុន​នឹង​រៀប​ការ​តាម​ទំនៀម​ទម្លាប់​របស់​កុលសម្ព័ន្ធ។ ចំពោះមូលហេតុដែលទើបរៀបការថ្មីៗនេះ លោក សំរ៉ាត់ បានឱ្យដឹងថា គឺដោយ​សារ​ពួក​គេ​ចង់​បើក​ផ្លូវ​ឱ្យ​ក្រុម​គ្រួសារ​មាន​សិទ្ធិ​ចូល​រួម​ក្នុង​ពិធី​ផ្សេងៗ របស់សហគមន៍ និងអាចចូលព្រះវិហារបាន ព្រោះវាជាទំនៀម​ទម្លាប់​របស់​កុលសម្ព័ន្ធ ដោយពួកគេ​មិន​ត្រូវ​បាន​អនុញ្ញាត​ឱ្យ​ចូលរួម​ក្នុង​ពិធី​សហគមន៍នោះ​ទេ​រហូត​ដល់​ពួកគេ​រៀបការ។

យ៉ាងណាក៏ដោយពិធីមង្គលការនេះបង្កអោយមានមតិចង្រូងចម្រាសនៅក្នុងសង្គម ដោយចោទជាសំណួរថា បុរសដែលមកពីកុលសម្ព័ន្ធអាចរៀបការជាមួយភរិយាដល់ទៅ៣នាក់ជាការពិតរឺទេ? ព្រោះតាមច្បាប់របស់ប្រទេសឥណ្ឌា ការមានប្រពន្ធច្រើននាក់ជាអំពើខុសច្បាប់៕

អត្ថបទ៖ Bee
ប្រភព៖ khaosod