អង់គ្លេសបានរាយការណ៍ពីករណីដ៏កម្រនៃជំងឺអុតស្វាយ Monkeypox ដែលកើតមានលើអ្នកដំណើរម្នាក់មកពីប្រទេសនីហ្សេរីយ៉ា

ទីភ្នាក់ងារសន្តិសុខសុខភាពរបស់ចក្រភពអង់គ្លេស (UKHSA) បាននិយាយនៅក្នុងសេចក្តីថ្លែងការណ៍មួយកាលពីថ្ងៃសៅរ៍ថា ករណីដ៏កម្រនៃជំងឺអុតស្វាយ Monkeypox ត្រូវបានគេរកឃើញនៅលើអ្នកជំងឺម្នាក់នៅក្នុងប្រទេសអង់គ្លេស។ ទីភ្នាក់ងារនេះបាននិយាយថា ជំងឺអុតស្វាយ Monkeypox គឺជាការឆ្លងមេរោគដ៏កម្រមួយ ដែលមិនងាយចម្លងមកមនុស្សនោះទេ ប៉ុន្តែជំងឺនេះអាចចម្លងពីមនុស្សទៅមនុស្សបាន គ្រាន់តែវាមានហានិភ័យទាបក្នុងការឆ្លងនៅក្នុងចំណោមមនុស្សទូទៅ។ UKHSA បាននិយាយថា អ្នកជំងឺបានឆ្លងមេរោគនេះនៅក្នុងប្រទេសនីហ្សេរីយ៉ា មុនពេលគាត់ធ្វើដំណើរទៅកាន់ចក្រភពអង់គ្លេសនាពេលថ្មីៗនេះ។ គាត់កំពុងព្យាបាលនៅអង្គភាពជំនាញជំងឺឆ្លង និងឯកោ Guy’s and St Thomas’ NHS Foundation Trust។

បើតាមប្រភព UKHSA បានឱ្យដឹងថា រោគសញ្ញាដំបូងរួមមាន៖ គ្រុនក្តៅ ឈឺក្បាល ឈឺសាច់ដុំ ឈឺខ្នង ហើមកូនកណ្តុរ ញាក់ និងហត់នឿយ។ ទីភ្នាក់ងារក៏នឹងទាក់ទងទៅអ្នកដែលមានទំនាក់ទំនងជិតស្និទ្ធជាមួយនឹងអ្នកជំងឺ ដើម្បីផ្តល់ព័ត៌មាន និងដំបូន្មានសុខភាព ដើម្បីជាវិធានការប្រុងប្រយ័ត្ន។ គួរឱ្យដឹងផងដែរថា ជំងឺ Monkeypox គឺជាជំងឺអុតស្វាយម្យ៉ាង ដែលត្រូវបានបាត់ទៅវិញតាំងពីក្នុងឆ្នាំ១៩៧៩ ឯណោះ ប៉ុន្តែបានផ្ទុះឡើងនៅក្នុងឆ្នាំ២០០៣ នៅសហរដ្ឋអាមេរិក ហើយក៏មានការផ្ទុះឡើងតិចតួចនៅចក្រភពអង់គ្លេសក្នុងឆ្នាំ២០១៨ ផងដែរ។ ឆ្នាំមុន CDC អាមេរិក ក៏បានស៊ើបអង្កេតករណីជំងឺនេះ ពីក្នុងអ្នកដំណើរម្នាក់ទៅកាន់ទីក្រុង Dallas ផងដែរ

យោងតាមមជ្ឈមណ្ឌលគ្រប់គ្រង និងការពារជំងឺរបស់សហរដ្ឋអាមេរិក (CDC) បានឱ្យដឹងថា ភាពខុសគ្នាសំខាន់ៗរវាងរោគសញ្ញានៃជំងឺអុតស្វាយ Smallpox និងជំងឺអុតស្វាយ Monkeypox គឺថា Monkeypox ធ្វើឱ្យឡើងកូនកណ្តុរ ខណៈដែលជំងឺអុតស្វាយមិនមានទេ។ សត្វកកេរ និងសត្វស្វាអាចផ្ទុកជំងឺនេះ ហើយអាចចម្លងវាទៅមនុស្សបាន៕

អត្ថបទ៖ លីដា
ប្រភព៖ CNN