មេដឹកនាំកូរ៉េខាងជើងលោក គីម ជុងអ៊ុន បានផ្ញើសារសម្ដែងពី «សាមគ្គីភាព» ទៅកាន់ប្រធានាធិបតីរុស្ស៊ីលោក វ្ល៉ាឌីមៀ ពូទីន
តាមសេចក្តីរាយការណ៍បានឱ្យដឹងថា មេដឹកនាំកូរ៉េខាងជើងលោក គីម ជុងអ៊ុន បានផ្ញើសារមួយទៅកាន់ប្រធានាធិបតីរុស្ស៊ីលោក វ្ល៉ាឌីមៀ ពូទីន ដើម្បីអបអរសាទរលោក ក្នុងថ្ងៃគម្រប់ខួប ៩ ឧសភា ថ្ងៃនៃជ័យជំនះរបស់សហភាពសូវៀតលើពួកណាស៊ីអាល្លឺម៉ង់។ ប្រព័ន្ធផ្សព្វផ្សាយរដ្ឋរបស់កូរ៉េខាងជើង បាននិយាយថា លោក គីម បានសម្ដែងពី «សាមគ្គីភាព» របស់គាត់ជាមួយរុស្ស៊ី ក៏ដូចជាសមិទ្ធិផលរបស់ប្រជាជនរុស្ស៊ី ដែល «គោលបំណងជាមូលដ្ឋាន គឺដើម្បីលុបបំបាត់ការគំរាមកំហែងផ្នែកនយោបាយ និងយោធា ដែលបង្កឡើងដោយកងកម្លាំងអរិភាព» និង «ការពារសន្តិភាព និងសន្តិសុខ» នៃប្រទេសរបស់ពួកគេ។
លោក គីម ជឿជាក់ថាមិត្តភាពជា «យុទ្ធសាស្ត្រ និងប្រពៃណី» រវាងកូរ៉េខាងជើង និងរុស្ស៊ី នឹងអាចពង្រឹង ហើយអភិវឌ្ឍតាមតម្រូវការនៃសម័យកាល និងស្របតាមផលប្រយោជន៍ជាមូលដ្ឋានរបស់ប្រជាជននៃប្រទេសទាំង២។ ជម្រាបដែរថា កូរ៉េខាងជើងបានបង្ហាញការគាំទ្ររុស្ស៊ីម្តងហើយម្តងទៀត ខណៈដែលរុស្ស៊ីកាន់តែមានភាពឯកោកាន់តែស៊ីជម្រៅ ជុំវិញការឈ្លានពានអ៊ុយក្រែន។ គេយល់ថា សាររបស់លោក គីម ទំនងជាមានគោលបំណងបញ្ជាក់ពីទំនាក់ទំនងមិត្តភាពជាមួយរុស្ស៊ី ខណៈកូរ៉េខាងជើងផ្ទាល់ កំពុងប្រកាន់យកជំហរប្រឈមមុខដាក់គ្នាកាន់តែខ្លាំងជាមួយនឹងអាមេរិក ដោយពន្លឿនកម្មវិធីអភិវឌ្ឍន៍នុយក្លេអ៊ែរ និងមីស៊ីលរបស់ខ្លួន៕
អត្ថបទ៖ លីដា
ប្រភព៖ NHK