អន្តរជាតិ
សហរដ្ឋអាមេរិក បង្ហូតទង់ជាតិនៅត្រឹមពាក់កណ្តាល ដើម្បីចូលរួមរំលែកទុក្ខក្រោយកូវីដ-១៩ បានឆក់យកជីវិតពលរដ្ឋអាមេរិកអស់ជាង ១លាននាក់
កាលពីថ្ងៃទី១២ ខែឧសភា ឆ្នាំ២០២២ តាមសេចក្តីរាយការណ៍របស់សារព័ត៌មាន REUTERS បានអោយដឹងថា «សហរដ្ឋអាមេរិកបានក្លាយជាប្រទេសដំបូងគេបង្អស់លើពិភពលោក ដែលមានចំនួនអ្នកស្លាប់បាត់បង់ជីវិតដោយសារជំងឺកូវីដ-១៩ ឈានចូលដល់ខ្ទង់លាននាក់។ យោងតាមរបាយការណ៍បញ្ជាក់ថា ចំនួនតួលេខរបស់សហរដ្ឋអាមេរិកពេលនេះ ជាការក្រើនរំលឹកទៅដល់សេចក្តីទុក្ខនិងភាពសោកសៅរបស់អ្នកបាត់បង់សមាជិករបស់ខ្លួន។ បើទោះជាភាពដែលគួរអោយខ្លាចរបស់មេរោគនេះ កំពុងតែសាបរលាបចេញពីដួងចិត្តរបស់អ្នកគ្រប់គ្នា ប៉ុន្តែតួលេខនោះបានឆ្លុះបញ្ចាំងអោយឃើញថា វាជាមូលហេតុចម្បងមួយនៃការស្លាប់របស់ជនជាតិអាមេរិក។ »

ប្រធានាធិបតីអាមេរិក Joe Biden បានចេញសេចក្តីថ្លែងការណ៍មួយថា ចំនួនអ្នកស្លាប់លើសពី ១ លាននាក់ គឺជាសោកនាដ..កម្មមួយ។ ក្នុងនោះលោកបានអំពាវនាវអោយប្រជាជនអាមេរិករស់នៅដោយមិនប្រហែស ខណៈការរាតត្បាតនៃជំងឺកូវីដ-១៩ នៅតែមិនទាន់បញ្ចប់។
ជាមួយគ្នានេះប្រធានាធិបតីអាមេរិកទទួលស្គាល់ថា សោកនាដ..កម្មដែលបានកើតឡើងនេះបានធ្វើអោយមានការសោកសៅយ៉ាងក្រៃលែង ថែមទាំងអំពាវនាវដល់ប្រជាពលរដ្ឋទាំងអស់កុំទាន់សុំាជាមួយនឹងភាពសោកសៅដែលបានកើតឡើង។ព្រមទាំងបញ្ជាក់ថា ការរីករាលដាលនៃជំងឺកូវីដ-១៩ បានផ្លាស់ប្តូរប្រទេសជារៀងរហូត។
មិនតែប៉ុណ្ណោះលោក Biden ក៏បានបញ្ជាឱ្យបង្ហូតទង់ជាតិត្រឹមពាក់កណ្តាល ដើម្បីគោរពវិញ្ញាណក្ខន្ធជនរងគ្រោះដោយសារមេរោគកូវីដ-១៩ ខណៈពេលដែលអ្នកស្រាវជ្រាវកំពុងពន្លឿនការអភិវឌ្ឍន៍វ៉ាក់សាំងថ្មី ដើម្បីប្រើជាដូសជំរុញ ដែលស្ថិតក្នុងអំឡុងការបំលែងខ្លួនយ៉ាងបន្តបន្ទាប់នៃមេរោគកូវិត១៩៕



អត្ថបទ៖ Bee
ប្រភព៖ reuters
អន្តរជាតិ
ក្រសួងសុខាភិបាលវៀតណាម កំពុងស្នើឱ្យមានការយកពន្ធអាករចំពោះភេសជ្ជៈមានជាតិស្ករលើសកម្រិត
ក្រសួងសុខាភិបាលវៀតណាមបានស្នើឱ្យមានការអនុវត្តពន្ធអាករសម្រាប់ភេសជ្ជៈផ្អែមទាំងអស់ ដើម្បីឱ្យស្របតាមការណែនាំរបស់អង្គការសុខភាពពិភពលោក នេះបើតាមការចុះផ្សាយរបស់សារព័ត៌មាន VNExpress។ ក្នុងកិច្ចប្រជុំស្តីពីផលប៉ះពាល់នៃភេសជ្ជៈផ្អែមលើសុខភាព កាលពីថ្ងៃព្រហស្បតិ៍ លោកស្រី Tran Thi Trang អនុប្រធាននាយកដ្ឋាននីតិកម្មនៃក្រសួងសុខាភិបាល បាននិយាយថា ក្រសួងកំពុងស្នើឱ្យអនុវត្តការយកពន្ធគយ ដោយផ្អែកលើបរិមាណជាតិស្ករនៅក្នុង ១០០ មីលីលីត្រទឹក។ ការស្នើនេះត្រូវបានធ្វើឡើង ខណៈក្រសួងហិរញ្ញវត្ថុកំពុងបង្កើតសេចក្តីព្រាងច្បាប់ស្តីពីពន្ធអាករសម្រាប់ភេសជ្ជៈផ្អែម។

លោកស្រីអនុប្រធានបាននិយាយថា វាគួរតែមានការចាត់ថ្នាក់កម្រិតជាតិស្ករឱ្យបានច្បាស់លាស់ ដែលមានន័យថា ជាតិស្ករកាន់តែច្រើន តម្លៃពន្ធក៏កាន់តែខ្ពស់។ លោកស្រីបានស្នើថា ភេសជ្ជៈដែលមានកម្រិតជាតិស្ករក្រោមកម្រិតជាក់លាក់មួយ នឹងមិនចាំបាច់ត្រូវយកពន្ធបន្ថែមនោះទេ។ ក្រសួងក៏បាននិយាយដែរថា នៅក្នុងប៉ុន្មានឆ្នាំចុងក្រោយនេះ ភេសជ្ជៈផ្អែមមានការរីកលូតលាស់យ៉ាងខ្លាំង ហើយពួកគេរំពឹងថា ភេសជ្ជៈទាំងនេះនឹងកើនឡើងពី ៣ ទៅ ៥% ក្នុងរយៈពេល ៥ ឆ្នាំខាងមុខ។
យោងតាមនិយមន័យរបស់អង្គការសុខភាពពិភពលោក ភេសជ្ជៈផ្អែមគឺជាភេសជ្ជៈដែលមានជាតិស្ករបន្ថែម ដូចជាទឹកសូដាផ្អែម ទឹកក្រូចដប និងភេសជ្ជៈប៉ូវកម្លាំង។ WHO ណែនាំឱ្យមានការដាក់ពន្ធលើភេសជ្ជៈផ្អែមលើសកម្រិតបែបនេះ គឺដើម្បីសុខភាព និងកាត់បន្ថយជំងឺធាត់ក្នុងចំណោមប្រជាជន។ យ៉ាងណាក៏ដោយ ក្រសួងសុខាភិបាលវៀតណាមនៅមិនទាន់វាយតម្លៃកម្រិតជាតិស្ករ ដែលនឹងត្រូវគិតពន្ធគយបន្ថែមនោះទេ។ ជាមួយគ្នានេះ ក្រុមហ៊ុនភេសជ្ជៈជាច្រើនក៏កំពុងស្នើសុំឱ្យពន្យារពេលការដាក់ពន្ធនេះ ដោយសារតែពួកគេទើបតែងើបពីជំងឺ COVID-19 ដែលបានប៉ះពាល់យ៉ាងខ្លាំង លើការផលិតក្នុងឆ្នាំកន្លងមក៕

អត្ថបទ៖ លីដា
ប្រភព៖ VNExpress
អន្តរជាតិ
ជនជាតិថៃម្នាក់ប្រកាសរកទិញក្រដាសប្រាក់ ២០បាត ដ៏កម្រមួយ ហើយគាត់ហ៊ានឱ្យថ្លៃរហូតដល់ ៣,០០០បាត ក្នុងមួយសន្លឹក
យោងតាមការចុះផ្សាយរបស់ The Thaiger បានឱ្យដឹងថា អ្នកប្រមូលទិញកាក់ និងក្រដាសប្រាក់ថៃមួយរូប បានប្រកាសរកទិញក្រដាសប្រាក់ ២០បាត ដ៏កម្រមួយ ហើយគាត់នឹងហ៊ានឱ្យថ្លៃរហូតដល់ទៅ ៣,០០០បាត នៅក្នុងមួយសន្លឹក។ ក្រដាសប្រាក់ ២០ បាតថ្មី ដែលបញ្ចេញឱ្យចរាចរកាលពីឆ្នាំមុន ត្រូវបានបោះពុម្ពដោយគ្មានបន្ទាត់បញ្ឈរនៅខាងឆ្វេង (ដូចក្នុងរូបខាងក្រោម) ហើយលោក Gig ដែលជាអ្នកប្រមូលទិញ នឹងផ្ដល់ជូនរហូតដល់ ៣,០០០បាត ទៅតាមស្ថានភាពក្រដាសនៅចាស់ ឬថ្មី។

លោក Gig បានប្រកាសរកក្រដាសប្រាក់ ២០បាត តាំងតែពីខែឧសភា ឆ្នាំមុន ដោយសារគាត់ដឹងថា ក្រដាសប្រាក់កម្រនេះនៅមានចរាចរ ហើយកាលពីខែមុន គាត់ក៏ធ្លាប់ប្រកាសឱ្យថ្លៃ ១,៥០០បាត ប៉ុន្តែពុំទាន់រកឃើញអ្នកលក់នោះទេ។ គាត់ក៏ហ៊ានឱ្យថ្លៃពី ៥០,០០០ ទៅ ១៥០,០០០បាត នៅក្នុងមួយដុំក្រដាសប្រាក់ដែលមាន ១០០សន្លឹកផងដែរ (លុយដែលបោះពុម្ភក្នុងបាច់តែមួយ)។
ជម្រាបដែរថា កាលពីខែកញ្ញាឆ្នាំមុន ធនាគារកណ្តាលថៃ (BOT) បាននិយាយថា ក្រដាសប្រាក់ថៃ ២០ បាតថ្មី ត្រូវបានបោះពុម្ពខុសបច្ចេកទេស ដោយលេខថៃ និងអារ៉ាប់មិនស៊ីគ្នាឡើយ។ ធនាគារកណ្តាលបាននិយាយថា ពួកគេកំពុងធ្វើការប្រមូលក្រដាសប្រាក់ដែលបោះពុម្ពខុសនោះ មិនឱ្យធ្វើចរាចរបន្ដទៀត។ ក្នុងពេលជាមួយគ្នានេះ ប្រជាជនថៃអាចប្រើប្រាស់ក្រដាសប្រាក់ដោយស្របច្បាប់បាន ប៉ុន្តែអាចបាននៅឯធនាគារពាណិជ្ជប៉ុណ្ណោះ៕

អត្ថបទ៖ លីដា
ប្រភព៖ The Thaiger