កងកម្លាំងរុស្សីបានប្រកាសជ័យជម្នះទាំងស្រុង ដណ្តើមយករោងចក្រដែក Azovstal ក្នុងទីក្រុង Mariupol បាន ក្រោយប្រយុទ្ធគ្នាអស់ជាច្រើនខែ
រុស្ស៊ីបានប្រកាសជ័យជម្នះរបស់ខ្លួន ពីក្នុងសមរភូមិអស់រយៈពេលជាច្រើនខែ ដើម្បីដណ្តើមយកទីក្រុងកំពង់ផែ Mariupol របស់អ៊ុយក្រែន នេះបើតាមការចុះផ្សាយរបស់ BBC។ មន្ត្រីរបស់ទីក្រុងមូស្គូបាននិយាយថា ក្រុមអ្នកប្រយុទ្ធអ៊ុយក្រែនចុងក្រោយ ដែលនៅការពាររោងចក្រដែក Azovstal របស់ទីក្រុង Mariupol ឥឡូវនេះបានទម្លាក់អាវុធសុំចុះចាញ់អស់ហើយ។ អស់រយៈពេលជាច្រើនខែមកហើយ ដែលទាហានអ៊ុយក្រែនបានបន្ដតសូរប្រយុទ្ធនៅក្នុងអគារដ៏ធំសម្បើម នៅក្នុងរោងចក្រដែក Azovstal ដើម្បីរារាំងរុស្ស៊ីពីការបង្កើតការគ្រប់គ្រងទាំងស្រុងលើទីក្រុង ប៉ុន្តែពេលនេះពួកគេមិនអាចទប់ទល់ទៀតបាននោះទេ។
ការជម្លៀសពលរដ្ឋអ៊ុយក្រែនកាលពីថ្ងៃសុក្រ គឺជាការបញ្ចប់នៃការឡោមព័ទ្ធទីក្រុង Mariupol ដោយកងកម្លាំងរុស្ស៊ីនៅក្នុងសង្គ្រាមជាមួយអ៊ុយក្រែន។ ឥឡូវនេះ ទីក្រុង Mariupol ស្ថិតក្នុងការបំផ្លិចបំផ្លាញទាំងស្រុង។ ក្រសួងការពារជាតិរុស្ស៊ីបាននិយាយថា ទីក្រុង និងរោងចក្រដែកនៅ Mariupol ឥឡូវនេះ «ត្រូវបានរំដោះទាំងស្រុង» បន្ទាប់ពីទាហានអ៊ុយក្រែនចំនួន ៥៣១ នាក់ បានចាកចេញពីទីតាំងនោះ។ វាបានបន្ថែមនៅក្នុងសេចក្តីថ្លែងការណ៍មួយថា «ទីតាំងក្រោមដីរបស់រោងចក្រ ដែលជាកន្លែងដែលពួកសកម្មប្រយុទ្ធកំពុងលាក់ខ្លួន បានស្ថិតនៅក្រោមការគ្រប់គ្រងទាំងស្រុង ដោយកងកម្លាំងប្រដាប់អាវុធរុស្ស៊ី»៕
អត្ថបទ៖ លីដា
ប្រភព៖ BBC