ប្រធានាធិបតីហ្វីលីពីនជិតអស់អាណត្តិលោក Rodrigo Duterte បានរិះគន់មេដឹកនាំរុស្ស៊ីលោក Vladimir Putin ចំពោះការសម្លាប់ជនស៊ីវិលស្លូតត្រង់នៅក្នុងប្រទេសអ៊ុយក្រែន ដោយគាត់បាននិយាយថា ពួកគេទាំង ២ ត្រូវបានគេមើលឃើញថាជាឃាតករ «ប៉ុន្តែខ្ញុំសម្លាប់ឧក្រិដ្ឋជន ខ្ញុំមិនសម្លាប់កុមារ និងមនុស្សចាស់ទេ»។ លោក Duterte ដែលធ្លាប់ហៅលោក Putin ថាជាទីគោរព និងជាមិត្តដោយបើកចំហ បានសម្តែងការរិះគន់របស់គាត់ជាលើកដំបូងបំផុត ជុំវិញការឈ្លានពានរបស់រុស្ស៊ីលើប្រទេសអ៊ុយក្រែន នៅក្នុងសុន្ទរកថាដែលបានចាក់ផ្សាយកាលពីថ្ងៃអង្គារ។

លោក Duterte មិនបានថ្កោលទោសប្រធានាធិបតីរុស្ស៊ី Putin នោះទេ ប៉ុន្តែលោកមិនយល់ស្របនឹងការដាក់សញ្ញានៃការឈ្លានពានរបស់លោក Putin ថាជា «ប្រតិបត្តិការយោធាពិសេស» ហើយបាននិយាយថា វាពិតជាសង្គ្រាមទ្រង់ទ្រាយធំមួយ ដែលប្រឆាំងនឹង «ប្រទេសអធិបតេយ្យមួយ»។ លោក Duterte បាននិយាយថា៖«មនុស្សជាច្រើននិយាយថា Putin និងខ្ញុំគឺជាឃាតករ។ ខ្ញុំ​បាន​ប្រាប់​អ្នក​ជា​យូរ​មក​ហើយ​ថា ​ខ្ញុំ​ពិត​ជាបាន​សម្លាប់​ហ្វីលីពីន។ ប៉ុន្តែខ្ញុំសម្លាប់ឧក្រិដ្ឋជន ខ្ញុំមិនសម្លាប់កុមារ និងមនុស្សចាស់ទេ។ យើងនៅក្នុងពិភពលោក ២ ផ្សេងគ្នា»។

ជម្រាបផងដែរថា លោក Duterte នឹងចុះចេញពីដំណែងនៅថ្ងៃទី៣០ ខែមិថុនា នៅពេលដែលអាណត្តិរយៈពេល ៦ឆ្នាំ ដ៏ច្របូកច្របល់របស់គាត់ត្រូវបានបញ្ចប់។ អំឡុងពេលដែលលោក Duterte កាន់តំណែងជាប្រធានាធិបតីហ្វីលីពីន លោកបានប្រើធម៌ក្ដៅ នៅក្នុងការបង្រ្កាបគ្រឿងញៀនដ៏ឃោរឃៅ ដែលនាំឱ្យមនុស្សជាង ៦,០០០ នាក់ ដែលភាគច្រើនជាជនសង្ស័យ បានស្លាប់នៅនឹងកន្លែង។ ក្រុមសិទ្ធិមនុស្សបានលើកឡើងថា ចំនួនអ្នកស្លាប់ពិតប្រាកដគឺច្រើនជាងនេះ ហើយបាននិយាយថា មនុស្សស្លូតត្រង់ រួមទាំងកុមារ ក៏ត្រូវបានសម្លាប់ផងដែរ នៅក្នុងយុទ្ធនាការរបស់លោក Duterte ដែលប្តេជ្ញាបង្រ្កាបគ្រឿងញៀន រហូតដល់ថ្ងៃចុងក្រោយរបស់គាត់ក្នុងនាមជាប្រធានាធិបតីហ្វីលីពីន៕

អត្ថបទ៖ លីដា
ប្រភព៖ Associated Press